Liverpool-in tun nipuia Ligue 1 club AS Monaco atanga an lei Brazilian defensive midfielder Fabinho chu tum ang leh beisei angin a khel tam lo hle a, hemi a nih avang hian media lam chuan Brazilian midfielder hian Anfield chhuahsan a duh niin an sawi nasa hle.

Fabinho hi Ligue 1 club lian Paris Saint-Germain nen sawizawm a ni nghala, mahse kum 25 mi hian chhuah mai a tum loh thu a sawi. Fabinho chuan, “Media lamah chhuak tur anga min sawi an awm tih ka lo hre thawi a, mahse Liverpool hi chhuahsan ka duh thu ka la sawi ri ngai lo hrim hrim.

“Hmun lailum chang tur chuan ka nghah deuh rih a ngai dawn tih ka hre sa a, Liverpool-ah hian ka hlima, chhuah chhan tur ka nei lo. Ka khelh lawk loh chhanah Klopp chuan eng vak mah min hrilh fiah lova, mahse training-naah ka rilru ka pe in, ka thawkrim em em a, engmah ka intihbuai tir ngai lo.

“Rim takin ka thawka, a chhan chu khelhna hun ka nei dawn tih ka hriat vang a ni. Tunah chuan a tam thei ang ber khelh ka duh. Tun hnaiah ka khel tam chho va, ka khelhna hmunah pawh hian ka lungawi. He hmunah hian chuan football boruak hi a danglam em a, hun ka neih huna tha taka khel turin ka inpeih reng a ngai a ni,” a ti.

Season tir lamah khel ngai lo mahse Fabinho chu tun hnaiah Liverpool manager Jurgen Klopp chuan a chhawr rim tan hle a, Liverpool game hnuhnung parukah Monaco midfielder hlui hi a la inlan vek. Liverpool midfield-ah hian James Milner, Jordan Henderson, Naby Keita leh Georginio Wijnaldum-te nen Fabinho hi hmun lailum chan tumin an inel mek a ni.