Paul Pogba chuan Liverpool chu champion phu a tih thu sawiin, champion tur chuan an duh lo tih thu a sawi tel bawk a ni.

Manchester United midfielder Paul Pogba chu a ke tihnat vangin nikum September thla atang khan a la inkhel mumal lo hle a, vawi hnih chiah khelmualah hmuh tur a la awm a. Liverpool chu che tha a tih thu sawiin, tuna an awmna pawh hi an phu ve reng niin a sawi.

Thawhtan zanah khan Liverpool chuan West Ham United chu 3-2 in an hneh a, match 18 chhung chu an chak tluang ta a, record ding lai an nihrual ta chiah bawk a. Tun season-ah chuan an champion ngei pawh a rinawm tawh hle a ni.

Pogba chuan, “Tun season chhungin league-ah vawi khat mah an la tlawm miah lo a, Premier League trophy chu kut lehlamin an vuan tawh a ni ber mai,” a ti.

“Manchester United player ka ni a, kan club inhal zia pawh hriat vek a ni a, hei vang hian keini chuan title an la tur hi kan duh lo hle a. Keimahni tih loh hi chu team dang hrim hrim hian trophy hi la lo se kan duh dan a ni,” a ti bawk.

A sawi zelnaah, “Hetih rual hian football hmangaihtu ka nihna leh player zahawm tak ka nihna atanga thlir chuan tuna Liverpool awmna hi an phu ve reng a ni ka ti lo thei lo a. Season hmasaah pawh an che tha thawkhat hle a, tun season-ah chuan an that belhchhah tawh lehnghal a ni,” a ti.

Liverpool chuan Premier League-ah point 22 ngawtin hma an hruai fal tawh a, tun season chhungin tu tan mah pawhthlak theih a beiseiawm tawh lo hle a, kum 30 zet an lo nghahfak tawh league title chu Anfield-ah an seng lut thei ngei dawn niin a lang.

Manchester United chuan nikum October thlaah khan Old Trafford-ah Liverpool chu an lo chelh a, point 1 ve ve an insem a, hei chiah hi tun season chhunga league bikah point 3 an hmuh loh awm chhun a ni.