Pep Guardiola sawisel a, Bayern Munich, Barcelona leh Manchester City an khaikhin fo thin chu Jurgen Klopp hian a ngai thiamlo hle a, a manager pui a chhan.

Bayern Munich leh Barcelona tha takin a enkawl a, Manchester City-ah beisei a phakloh avangin Guardiola hian sawisel a hlawh a, 'a tha tak tak lo a niang nge' ti pawl lah an tam.

Manchester City hi Champions League round of 16 atanga tla hlim an ni a, Premier League-ah chhiarkawp danin la champion thei mahse FA Cup bak an beisei ngam tawh kher lovang.

Liverpool boss Klopp chuan The Independent kaltlangin, "Pep hi in sawisel leh thin a, tuna a squad neih leh a team hmasa a squad kha han khaikhin chiah teh u.

"Messi-a telna team nge tha zawk ang a, Messi awmlohna? Chutiang chiahin Iniesta awmna team nge tha zawk ang a, Iniesta awmlohna team? Hei hi a danglamna a ni a, kan hriat atan ka duh hle.

"Tuna Pep-a enkawl lai leh a lo enkawl tawhte kan khaikhin dawn a nih chuan an squad neih dan hi zir chiang hmasa phawt rawh u. A record ringawt in en a, Premier League a harsat ziate hi min hriatpui a tha.

"Pep nen hian kan buaina a in ang reng a, ropui taka kan chak chang a awm a, nimahsela kan chaklohin thawm a nei ring zel mai hi a pawi kati.

"England leh Spain tehkhin ta ila, Spain-ah chuan Real Madrid leh Barcelona an chungnung lawr lak a, tun hnaiah Atletico Madrid leh Sevilla an kheltha a, Valencia hian khelhthat season an nei zeuh bawk. Mahse Barcelona leh Real Madrid elpha tak tak an awmlo.

"Premier League-ah ve thung chuan kar tluana theih tawp chhuah a kan thawhrim pawhin chaklo chang a tam. Club-te zawk a kan ngaihte pawhin min hneh leh thin. Hei hi club zawng zawng chunga thil thleng a ni. Bundesliga-ah chuan Bayern-in an tumpuite an hneh dawn tih inkhelh hma in a hriat sa a, chutiangin Barcelona leh Real Madrid pawh.

"Mahse Premier League hi chu khawvel league-a inelna sang leh hautak ber a ni. Tute pawh khel dawn ila chak tur a sawi lawk ve theihloh, "tiin a sawi.