15 Sep 2020 06:01

inkhel

Liverpool bawk an champion leh ang: Torres

Fernando Torres chuan Chelsea chu team ropui tak din tura thawkrim nia sawiin, season tawpah erawh Liverpool bawk an champion a rin thu a sawi.

Liverpool leh Chelsea striker hlui Fernando Torres chuan a vanglaiin Anfield leh Stamford Bridge velah hun a lo hmang tawh thin a. Anfield-ah hian ngaihsan a hlawh hle a, fak pawh a hlawh viau a, London khawpui lamah erawh pawisa tam tak sen thlawnna mai tia sawi a hlawh ve thung a ni.

Tun hnaiah Amazon Prime chuan Spanish striker hlui Fernando Torres chanchin tih lanna documentary an tlangzarh dawn a, he mi hma hian a vanglaia a khelhna thin Premier League club pahnih dinhmun hi a thlir kual a ni.

Torres chuan, “Liverpool leh Chelsea te hian team ropui tak an din chho mek niin ka hria a, tun season atan chauh pawh ni loin nakin zel atan an team hi an siam tha chho mek a ni,” a ti.

“Chelsea hian tan an la nasa khawp mai a, Frank Lampard kaihhruaina hnuaiah player naupang tak tak, tha deuh deuh an fawm khawm a, nakin zela la that belh zel tur an thur chhuak nasa hle a. Season liam taah pawh khan player naupang deuhte chu tha takin a enkawl thei a ni tih a lantir tawh a ni,” a ti bawk.

A sawi zelnaah, “Frank Lampard kaihhruaina hnuaiah Chelsea hi an tha viau dawn tih a chiang a, title la thei dinhmunah pawh an din a rinawm a. Chutih rualin Liverpool leh Manchester City te hi khum an harsa hle ang tih chu a chiang sa a, season tawp thlengin boruak a sang hle turah ka ngai,” a ti.

“Season a tawp meuh chuan Manchester City leh Chelsea te aiin Liverpool hi an chungnung leh ngeiin ka ring a, Reds bawk hian Premier League title chu an la leh ang,” tiin Torres chuan a sawi a ni.