Premier League-ah Merseyside derby khelh a ni a, Liverpool chuan Anfield-ah an hmelma Everton an lo mikhuala, Liverpool hi si khat faia chak hramin, an vannei hle. Everton hi kum 1999 hnuah Anfield-ah an la chak thei lo tluang zel. Team hnihten inkhel hmuhnawm tak min hlui a, team te zawk Everton pawh an hmelma Liverpool lakah an duai lo hle a, ppint khat tal an hlawhchhuak lo erawh an vanduai hle.
Liverpool tan second half-a dah luh; khel khat tak Divock Origi chuan goal awmchhun a khunga, Liverpool-in point thum an hlawhchhuah phah. Liverpool hian khelh 14-ah point 36 hlawhchhuak tawhin pahnihnaah an la awm zela, point hnihin hmahruaitu Manchester City an pha lo. Everton hian khelh 14-ah tho point 22 hlawhchhuak tawhin paruknaah an awm thung a ni.
Liverpool 1-0 Everton
(Origi 90+6’)
PLAYER RATINGS
LIVERPOOL: Alisson 8, Alexander-Arnold 7, Van Dijk 8, Gomez 8, Robertson 7, Fabinho 8, Wijnaldum 7, Shaqiri 7, Firmino 6, Mane 6, Salah 6. Subs: Keita 6, Sturridge 6, Origi 7.
EVERTON: Pickford 6, Coleman 7, Mina 8, Keane 8, Digne 8, Gomes 8, Gueye 6, Walcott 5, Sigurdsson 7, Bernard 8, Richarlison 7. Subs: Lookman 7, Calvert-Lewin n/a, Zouma n/a.
Match Report
Inkhel tan a ni a, hun rei a ral hman lo; 4mins-ah Everton-in chance tha tak an hlah nghal. Alexander-Arnold chu foul-in Everton-in mual veilamah free-kick an hlawhchhuaka, free kick atanga ball vawrh luh chu goal hmazawna awm Yerri Mina chuan lo tauhin, a goal lo chiah chiaha, a uiawm hle. Liverpool-in an nawr ve leha, box chhung dinglam atangin Alexander-Arnold chuan lei hrulah ball a cross-a, Mohamed Salah a thlen hma in Everton lamin an dang chat hman. Minute sawm khelh a ni a, Liverpool-in chance tha tak an hlah ve leh. Andy Robertson chuan Salah ball a pe a, Salah hian box chhunga inpawt Sadio Mane chu a kangin ball a pe a, Mane hian Jordan Pickford bak paltlang tur nei tawh lo mahse a pet goal chuang lova, goal a pet khum luah.
Minute sawmhnih khelh a nih hma deuhin, mual dinglamah Salah chu ball pek a ni a, ani hian Roberto Firmino pe ve lehin, Brazilian forward hian Everton box chhungah khalhin goal-ah a pet a, goal a zawn lova, engahmah a chhuah lo. Hemi hnu lawk hian Everton-in an khung teuh hle a, Andre Gomes chuan ball khalhin mual veilamah Bernard a pe a, Bernard hian cross in, box chhung dinglama awm Theo Walcott chuan goal hmazawnah a lu in a pe phei ve leha, Gomes hian hnai set sawt atangin tauh mahse goalkeeper manto Alisson Becker chuan a save tha hle. Alisson hian ball a man loh avangin Everton lamin tih goal an tum zui a mahse goal line atangin Liverpool defender Joe Gomez chuan ball hi a tlawh sawn leh hman hram.
Darkar chanve khelh a nih hma hretin Firmino chuan ball a khalha, box pawn atangin goal-ah a pet a, pet tha hle mahse Pickford chuan a lo save. 34mins-ah Idrissa Gueye-a ball khalh lai chu chhuhsak niin, Salah chu ball pek a ni a, box chhung dinglama tlan lut Xherdan Shaqiri chu Salah hian pe in, Shaqiri hi ti goal ngei tura ngaih ni hman mahse Pickford chuan a lo dang. Team hnihten chance nei ve ve mahse an chance neihah Everton hi an hlauhawm zawk a tih theiha, first half hi 0-0 in a tawp.
Second half tan atanga minute sarih vel a ralin, Firmino chuan tha takin Mane chu through ball a pe a, Mane hian Everton box chhungah khalh lutin, a pet goal ngei dawna a lan laiin Everton defender-ten an tihbuai deuh avangin goal sirah a peta, a goal lo. Darkar khat khelh a nih hma hretin Mane chuan box pawn atangin Everton goal-ah a pet a, mahse goal a zawn lo. Everton-in an nawr let ve leha, mual dinglam atangin Walcott chuan cross tha viau mahse Alisson chuan ball chu a lo man. Darkar khat chuang khelh hnuah Everton hian Liverpool an nawra, box pawn hret atangin Bernard chuan goal-ah petin, pet chhe lem lo mahse goal a zawn tawk lo. Liverpool-in nawr let ve leh nghalin veilam atangin Robertson chuan hniam te ah cross mahse ball lo khawih tur an awmlo.
Team hnihte hian chance nei tawn reng mahse goal thun thei an awm lova, hun tawp hnaih lamah Liverpool-in goal an khung teuh hle. Mual veilamah Divock Origi chu ball pek a ni a, ani hian ball tlanpuiin lei hrulah ball a cross chhova, mahse Liverpool hian engahmah an chhuah lo. Reds hian corner hmu zuiiin, corner atanga ball vawrh luh chu Virgil Van Dijk chuan lo tauh sawtin a goal teuh hle a, goal bar a pera a uiawm hle. Goal awm lovin team hnihte an inhnehtawk dawn emaw tih hnuah; injury time pawh a kal zawh vek hnuah Liverpool-in goal an khunga, goal khungtu hi second half tawp lama lut Origi-a thun a ni. Liverpool hian free kick an hmu a, hmanhmawh takin Alisson chuan Alexander-Arnold a pass a, Alexander-Arnold hian mual dinglam atangin Everton box lamah vawrh lutin, Van Dijk chuan a lo peta, Van Dijk a pet hi kang luahin Everton goal bar fuha goal kick nimai tura ngaih chu Pickford chuan a lo khawih a, goal bar-ah sawt pheiin, khelmual chhungah ball hi a sawt lut leha, goal bula awm Origi chuan a lo tauh lut a, Liverpool hi si khat faiin an chak phah ta a ni.
