Jose Mourinho chuan tun season chhungin Liverpool chu Premier League champion an nih ve tawh a rin thu a sawi.

Pathianniah Liverpool chuan Premier League champion lai Manchester City chu Anfield-ah an mikhual a, he inkhelah hian Reds chu 3-1 ngawtin an chak a. Hetia an chak hnuah hian Jose Mourinho chuan Liverpool chu an nghahfak title la thei ve tawh tura a rin thu hi a sawi chhuak.

Liverpool chuan kum 30 zet mai Premier League title lak tumin an lo bei tawh a, tun season kal mekah chuan an la che fuh chho hle a, a vawi khatna atan an champion theih mai pawh a rinawm hle a. Manchester City an hneh chiah khan Premier League-ah point 8 in hma an hruai thei chiah a ni.

England ramah chuan Liverpool hi league title la hnem ber dawttu an ni a, hetih lai hian 1989-90 season atanga Premier League tia a hming an vuah hnuah an la champion thei miah lo a ni.

Chelsea a enkawl laia Premier League title vawi thum latu, Manchester United manager hlui Jose Mourinho chuan tun season-a champion thei tura a rin ber chu a sawi chhuak der tawh a. Tun dinhmuna an awm dan a thlirin Liverpool chu Premier League title la ve thei tawh ngei tura a rin thu hi a sawi a ni.

Mourinho chuan, “Title lak tum tak tak chuan la thei kan ni ngei tih hi kan thinlungah kan dah ngheh tlat a pawimawh a. League hmahruaitu kan nih chuan chutiang dinhmuna awm zui reng theih tumin theihtawp kan chhuah bawk tur a ni,” a ti.

“Liverpool hi tunah tak chuan champion thei tura beiseiawm ber an ni mek a, an khelh dan en pawhin league title hi an lak theih a beiseiawm hle a. Tuna a lan danah chuan thil danglam tak a thleng te a nih ngawt loh chuan Liverpool hi Premier League champion an ni thei ngei dawn a ni,” a ti bawk.

A sawi zelnaah, “Manchester City hi a zawnin vawi sarih, vawi riat, vawi kua lai pawh an chak thei. Amaherawhchu, Liverpool hian point 8 in hma an hruai mek a, hetiang dinhmun thaa an din hnu hian an che buai lo tura ngaih a ni,” a ti.