Premier League-a striker awm tawh zawng zawnga goal khung hnem ber Alan Shearer chuan Premier League season kal mek chu khelh zawh theih a nih loh thut chuan Liverpool chu champion-a puan an nih ngawt theih loh thu a sawi.

Ka hriat theuh angin tunlai hian hripui coronavirus (Covid 19) chuan khawvel a chawk buai hneh em em a, football lamah pawh nasa takin nghawng a nei a, Europe-a football league lian zawng zawng chu cancel vek rih a ni nghe nghe.

Covid 19 hian reh lam a pan mai dawnin a lang lova, a lo chhuahna China lamah chuan tlahniam tan viau mahse Europe lamah erawh a la darh chak hle a, Europe hi a tuar ber an ni dawn ni pawhin a lang chho mek.

Europe-a league lian te hi April thla tir thleng inkhel cancel vek rih a ni a, mahse tuna a lan dan hi chuan April-ah pawh season hi chhunzawm theih a nih loh hmel viaua, heti ang a nih chuan season hi tihtawp dan ngaihtuah mai a ngai dawn.

Premier League bikah Liverpool chuan point 25-in hma an hruai meka, champion turin vawi hnih chak chiah an mamawh tawha, season hi khelh chhunzawm theih a nih loh chuan champion-a puan an ni mai dawn anga sawi pawh tam mahse, tun season kal mek chu eng mah lova chan tir pawh a ni thei tho a, ngaihdan hrang hrang a tam hle.

Premier League-a goal 260 khung thei Shearer chuan, “Season hi khelh zawh theih a nih loh thut chuan chak zawk emaw chak lo zawk emaw kan nei ngawt thei lo. Inkhelh tur awm ang ang khelh zawh theih a nih loh chuan tu hnenah mah title hlan emaw tu emaw tlak tir ngawt emaw a theih lova, mahse Liverpool tan chuan a rilru nat thlak hle ang.

“Champion turin point ruk chiah an mamawh tawha, mahse an la champion miau loh avangin season tihtawp a ngai chuan season hi engmah lovah chan tir a ngai. Point an hmuh hnem tawh em avangin season hi tihtawp a ngai a nih chuan, an la hle ang,” tiin The Sun a hrilh.