Liverpool forward Mohamed Salah chuan chanchin a nei zui zel a, nakkum nipuiah Anfield a chhuahsan dawn tih thawm a awm.

Liverpool hian a chhuak anih chuan Real Madrid winger Rodrygo biak an tum tih thuthang a awm tel a, a hun la hla deuh mahse nakkum transfer bazar a nghahhlehawm ta hle. 

Rodrygo hian Carlo Ancelotti hnuaiah hmun a chang tam lutuk tawh lova, Santiago Bernabeu atanga inputchhuah a hreh lo niin an sawi.

Salah-a hmalam hun pawh a chiang lo khawp mai a, nipui bazar khar tawp ni khan Al-Ittihad in dawr mahse an thlem chhuak zo lo. Saudi Arabian club hian a manah £170m thehchhuak phal mah se, Liverpool-in zawrhlai a ni lo tiin an hnar a, midang biakna hun an nei tawh lo bawk nen an la kawl zui zel.

Aigupta forward hian thlasik transfer bazarah chhuah a tum maithei a, hei vang hian a hmun ruak hnawhkhattu tur zawn thuai a tul. Liverpool hian mithar an melh tan niin The Sun chuan an ziak a, Salah hi tun season bak kawl theih an inbeisei tawh lo niin an sawi.

Inven reng ngaia an awm avangin lo inhmakhua lawk an duh a, Rodrygo hi an duh berte zingah a tel niin a lang. Brazilian winger hian 2025 Nikir thla thleng daih contract a la nei a, a chhuak a nih chuan £86m man vel anih a rinawm.

Real Madrid-in Kylian Mbappe an la lut a nih chuan an hralh phal ngei dawn a, Vinicius Junior erawh a nghet thei ang bera awmtir an duh. Rodrygo hian 2019 nipui lai khan Santos kalsanin Madrid a pan a, £40m man niin hma a sawn chak hle.

Spain-a a awm chhungin La Liga vawi hnih bakah, Champions League leh Copa del Rey vawi khat ve ve an la tawh a, game 171 khelin goal 38 a khung bawk. 

Ancelotti-a'n Brahim Diaz a duhsak zawk avangin a hlim lo tih thawm a awm a, Liverpool player a ni thuai lo ang tih a sawi theih loh a ni.