Liverpool-ah Robertson a nghet

18th January 2019, 06:01AM

Scottish left-back Andrew Robertson chuan Liverpool-a cham zel turin hun rei tak chhung atan a contract neih lai a pawtsei.

Robertson-a contract thar ziah hi a rei hun chhung tarlan a ni lova, mahse kum nga daih niin chanchinbu mite chuan an sawi a, kum 2024 vel thleng Andfied-a cham turin contract thar hi a ziak niin chanchinbu mite chuan an tarlang bawk.

Scotland captain hi Liverpool player pawimawh ber zinga mi leh manager Jurgen Klopp-a player chhawr rim ber zinga mi a ni a, Liverpool hian tun Premier League season kal meka goal sawm chiah an la chhuahna kawngah Robertson hi a thawhhlawk hle.

Kum 24 mi hian kum 2017 nipui lai han Hull City atangin Anfield hi a pan a, a manah Liverpool hian pound maktaduai 8 bawr vel bak an seng lova, an lalut fuh hle. A tirah khelhna hmun tha chang mai lo mahse hun reilote chhungin Alberto Moreno a luahlana, Liverpool left-back rinrawl ber a ni chho ta char char a ni.

Robertson chuan contract thar a ziah chungchang Liverpool website hrilhin, “Club-in min rawn biak tirh khan ka inngaihtuah buai chhin eih lova, he hmuna cham zel hi ka duh a, contract thar min zawrh chiah khan ka pawm nghal a ni.

“Contract thar ziah kha ka tan thil awlsam tak a ni a, club tan pawh a awlsam ve ngei ka ring. Kan inrem nghal thuaia, chuvang chuan hun reilote chhungin engkim tihfel a ni. Melwood-ah hian ka thiante leh staff-te bula awm hi nuam ka ti em em a, kan hna hi nuam kan tih chuan a hlu ber a, chu chu he hmunah hian ka tawng mek a ni. Ka contract ka pawtsei thei hi ka lawm hle a, hmalam hun eng tak kan neih ngei ka beisei,” a ti.

Sawi zelin, “Ka contract thar ka hman chhung hian team anga kan hlawhtlin ngei ka beisei a, Liverpool hi trophy chawi ngei ngei tur kan nih laiin, trophy kan la lo rei ta lua a ni. Chuvang chuan he hmunah hian trophy hawn ngei ka duh a, chumi a thlen theih nan chuan theihtawp ka chhuah dawn a, club in min phut mai bakah fans lam pawhin min phuta, chu chu tih hlawhtlin ngei kan duh.

“Champions League pawh kan la teuh em em a, mahse tunah chuan hmalam thlir hun a ni a, eng inelna pawh nise kan nghawgah hian medal awrh kan duh a, chu chu kan tum ber a ni,” a ti bawk.

Copyright © inkhel.com 2024. All rights reserved.