Liverpool chuan Burnley atangin English striker Danny Ings an lalut dawn a, inremna siam tawh niin medical test paltlang tur ala nei.

Kum 22 mi Ings hian tun thla chhung chauh Burnley-ah hian contract a nei tawh a, kum 24 hnuailam ala nih avangin Liverpool hian Burnley hnenah sum an pek a ngai dawn a July ni 1 atangin The Reds hi a zawm ang.

English striker hian season liamta Premier League-ah khan game 35 khelin goal 11 a khung a, hei hi season liamta tho va Liverpool striker neihsa palite goal belhkhawm aiin a tam zawk a thiante pet goal tura siamsak pawh vawili a nei.

Kum 2009 khan Bournemouth atangin football zinkawng alo zawh tan a, Cherries-ah hian kum 2011 thleng a awm a kum 2010 khan loan-in Dorchester Town-ah a khel.

Kum 2011 August ni 15 khan Burnley hian an lei a, kum li daih contract an ziahpui.

Ings hian kum 2013-2014 season khan Premier League khel turin Burnley hi a kaipui a, hemi season hian Championship Player of the Year-ah thlan a ni bawk a Burnley tan hian belhkhawmin game 130 a khel a goal 43 a khung tawh.

England Under-21 tan pawh game kua khelin goal li a khung tawh a, Czech Republic-in tun thlaa a thlen tur European U-21 Championship khel tur England U-21 squad-ah a tel bawk a ni.

Ings hi tun nipui transfer-a Merseyside club player an lakluh pahnihna a ni dawn a, kar liamta khan Manchester City atangin James Milner an lo lalut tawh a ni.

Season liamta khan Liverpool hian goal khung lamah harsatna an tawk a, an striker - Mario Balotelli, Fabio Borini, Rickie Lambert leh Daniel Sturridge-te'n belhkhawmin goal riat chiah an khung a Premier League-ah parukna an ni.