Liverpool-ah Clyne a lut fel.

01st July 2015, 11:07PM

Liverpool chuan Southampton atangin England right-back Nathaniel Clyne an lei fel a, £12.5m sengin kum nga daih tur contract an ziahpui.

The Reds hian £10m-a lakluh tumin Saints hi an dawr a, mahse hnawlsak an nih avangin an tipung a an hlawhtling. Thawhtanni khan Clyne hian medical a paltlang tawh niin an sawi a, tunhnai season thum liamta Premier League-ah khan game 94 a khel.

Kum 24 mi Clyne chuan, "Club sulhnu nei tha tak ka zawm thei hi ka lawm a duhthusam a ni. Liverpool-in min lalut duh tih ka hriat khan ka hlim hle a, engkim kaltluang se ka ti a inkhelh ka chak tawh khawp mai." tiin a sawi.

England national team tan game nga a khel tawh a, ram tan a game hmasa ber chu kum 2014 November thla khan Slovenia an hmachhawn tumin a khel.

Saints-ah hian kum khat daih contract ala nei a, tun nipui transfer chhunga Liverpool player thar lakluh parukna a ni.

Merseyside club hian Roberto Firmino, Danny Ings, James Milner, Joe Gomez leh Adam Bogdan-te pawh an lo lalut tawh a, kum 2012 hnua Brendan Rodgers an chhawr atangin player lei nan £250m an seng tawh.

Season liamta khan beisei an pha lo va, season tharah Champions League an khel pha dawn lo bawk nen player thar an melh a tun nipui transfer chhunga chanchin ngah pawl tak an ni.

Copyright © inkhel.com 2024. All rights reserved.