Barcelona player Pilippe Coutinho chuan tun nipui chhungin Camp Nou a chhuahsan ta nge nge dawn niin a langa, mahse an club hlui Liverpool hmelma lian ber Manchester United zawm a tum lo niin Sky Sports chuan a tarlang.
Coutinho hian kum 2013 khan naupang te niin Liverpool chu Inter Milan atangin a zawm a, nikum khan Liverpool atang hian Barcelona lamah a insawn.
Barcelona-ah beisei a pha tawk lova, hemi a nih avang hian Barca pawhin an player hi ui vak lovin, a phu tawka dawrna an hmuh chu an ngaihven dawn ni pawhin sawi a tam.
Coutinho hi Premier League-a kir tur anga sawi a ni a, Manchester United nen nasa taka sawizawm a ni. Coutinho-a club hlui Liverpool leh Manchester United inhal zia chu kan hre theuh anga, Coutinho hi United-ah a lut a nih chuan rilru na tur fe fe an awm nuk dawn.
Mahse Coutinho hian Liverpool supporter-te rilru a nat loh nan United zawm a tum loh thu hi English chanchinbu rintlak tak Sky Sports chuan a tarlanga, Liverpool tan chanchin lawmawm a ni ber.
Coutinho hi tunah hian Copa America khelin Brazil tan a fehchhuak mek a, Paris Saint-Germain nen inbiakna na kalpui tan niin Sky Sports chuan tarlangin, Chelsea nen pawh kum 27 hi sawizawm a ni bawk.
Barcelona hian pound maktaduai 142 vel laiin Coutinho hi Anfield atangin an thlem chhuak a, a man phu in a khel lem lo. Tun season hman zawh takah khan Coutinho hi Barca tan 54 inlanin goal 11 a khung a ni.