Manchester City midfielder Ilkay Gundogan chuan Premier League season kal mekah Liverpool chuan champion an phu a tih thu a sawichhuak.
Liverpool hi season kal mekah che tha fal hle in, champion turin vawi hnih chak chiah mamawh tawh mahse coronavirus avangin season chu tihtawp lai lawk a ni rih a, April thla ni 30 thleng hian season tihtawp lailawk ni mahse season chhunzawm a nih hun tur hi a sawi theih chuang loh.
Season khailak lo se chuan Liverpool hi March thla khan champion ngei tawh tura ngaih an ni a, Premier League hmahruaitu niin, anmahni hnaih ber tu Manchester City aiin point 25 laiin an sang zawk.
Kum 30 hnuah a vawi khat nan league title an la mai dawn anga a lan laiin, hripui leng avangin football a chawl thupa, hripui leng hian Europe-ah zia lam aiin zual lam a pan mek avangin season awm zel dan turah chiang a awm lova, season hi tih tawp mai a ngai lovang tih pawh a sawi theih loh.
City midfielder Gundogan chuan, “Season khelh chhunzawm theih a nih loh chuan Liverpool champion tir mai hi an phu in ka hria a, chu chu sportsperson ka nihna atanga ka hmuh dan a ni. Ngaihdan hrang hrang a awm thei a, season hi eng mah lova chantir a nih chuan club che tha te tan a lawmawm dawn lova, club che tha lo te tan; a bikin tla thei dinhmuna awm te tan chuan a lawmmawn dawn a ni,” a ti.