06 Dec 2018 04:43

inkhel

Lionel Messi aia thiam an tam: Pele

Brazilian legend Pele chuan Lionel Messi chu thiam a tih tawk loh thu sawiin, Argentine star rau rauah Diego Maradona pawh a la san zawk daih thu a sawi.

Mi tam tak chuan Lionel Messi chu khawela footballer awm tawh zinga tha ber leh ropui ber niin an chhal a, Ballon d’Or pawh vawi 5 a dawn tawh bakah chawimawina dang tam tak a dawng tawh a. Heng bakah hian record chi hrang hrang a siam teuh tawh bawk a ni.

Pele chuan Barcelona superstar Messi chu a kal khat leh lutuk tia sawiin, a ke veilamah ringawt a innghat bur ringawt a, hei hian a ti ropui lo zo vek niin a sawi a. Footballer ropui dangte chu Messi ang hi an nih loh thu sawiin, hei vang tak hian an ropui dan a nasa leh zual niin a sawi a ni.

A vanglaia goal 1000 chuang thun thei, World Cup a vawi 3 champion thei Pele chuan, “Engtin nge tha taka ball tauh thei, a ke veilama goal thun thei a, a ke dinglam pawha goal thun harsat chuang lo hi ke veilam chauh hmanga ball pet thin, thiamna pakhat chauh nei leh ball tauh tha thei mang lo nen hian in khaikhin theih zawk le?” a ti.

“Pele leh footballer dang in khaikhin dawn a nih phei chuan ke veilam leh dinglama goal thun thei ve ve, lu hmang pawha goal thun harsat miah lo an nih a ngai a, chuti a nih loh chuan khaikhin chi a ni lo tihna a ni mai,” a ti bawk.

A sawi zelnaah Pele chuan Messi ai chuan a ropui zawk daih tih a sawi a, football thiam dan indawta dah tur ni se Blaugrana star aia footballer dah hmasak tur a ngah thu a sawi tel bawk a ni.

Pele chuan, “Ka ngaihdanah chuan Maradona kha khawvela footballer tha ber pawl a ni a, Messi aia a that leh that loh min zawt ta se a tha zawk tiin ka chhang ngei ang a. Franz Beckenbauer leh Johan Cruyff te pawh Messi ai chuan an tha fe zawk,” a ti bawk.