Thawhtanni zanlai khan FIFA The Best Award semna hun hman a ni a, he ceremony hi France khawpui Paris-a Theatre du Chatelet-ah neih a ni.

Award nghahhlelh ber 2022 The Best FIFA Men’s Player lawmman chu beisei ang ngeiin Argentina captain Lionel Messi chuan a dawnga, he lawmman hi kum 35 mi hian a vawi hnih nan a dawng a, kum 2019 khan a lo dawng tawh bawk.

PSG player Messi hian Qatar-ah khan a ram Argentina chu a champion pui a, Messi hian Golden Ball a dawng bawka, 2022 FIFA The Best voting period chhung hian game 74 a khela, goal 45 thunin, assist vawi 34 a nei a, trophy pali a chawi.

Hmeichhe lamah Barcelona leh Spain midfielder Alexia Putellas bawk a thiam ber leh a, nikum pawh khan kum 29 mi hi The Best FIFA Women’s Player atana thlan a lo ni tawh bawk a ni.

Qatar World Cup-a Argentina champion puitu Lionel Scaloni chu 2022 The Best FIFA Men’s Coach atana thlan niin, England hmeichhe team head coach Sarina Wiegman chu 2022 The Best FIFA Women’s Coach atana thlan a ni ve thung.

Mipa lam goalkeeper tha berah Argentina leh Aston Villa goalkeeper Emiliano Martinez thlan a ni a, hmeichhe lam goalkeeper tha ber hi England leh Manchester United keeper Maru Earps a ni bawk.

Polish club Warta Poznan footballer Marcin Oleksy chuan goal mawi ber lawmman FIFA Puskas Award a dawng a, Argentinian suppoter te chuan FIFA Fan Award an dawng bawka, Luka Lochoshvilli chuan FIFA Fair Play Award a dawng bawk.

Mipa leh hmeichhe FIFA Fifpro World 11 thlan a ni bawka, a hnuaiah hian tarlan an ni.

2022 FIFA FIFPro Men's World11 (formation 3-3-4):

• GK- Thibaut Courtois
• DF- Achraf Hakimi
• DF- Virgil van Dijk
• DF- João Cancelo
• MID- Kevin De Bruyne
• MID- Luka Modrić
• MID- Casemiro
• FW- Lionel Messi
• FW- Erling Haaland
• FW- Karim Benzema
• FW- Kylian Mbappé

2022 FIFA FIFPro Women's World11

• Christiane Endler
• Lucy Bronze
• Leah Williamson
• Wendie Renard
• Mapi León
• Keira Walsh
• Alexia Putellas
• Lena Oberdorf
• Alex Morgan
• Beth Mead
• Sam Kerr