Lionel Messi - 32

24th June 2019, 11:06PM

Khawvela footballer tha ber tia sawi kai, chawimawina leh trophy pawh la hnem tawh tak mai, Lionel Messi chuan vawiin (June 24) hian kum 32 a tling ve ta a. A piancham denchhen hian a chanchin thenkhat thur chhuak nual teh ang.

A tirah chuan..
Central America atanga footballer duhawm tak mai Lionel Andrés Messi hi June 24, 1987 khan Argentina rama Rosario khuaah a piang a. Jorge Messi leh Celia Cuccittini te fa pali zinga pathumna niin, a pa hi steel factory manager a ni a, a nu hi magnet siamna hmunpuiah a thawk bawk a ni.

A pa hi Italian leh Spanish thlah pawlh kal zel niin, a nu pawh Italian thlah kal zel a ni bawk a. Football ngaina chhungkuaa seilian niin, a naupan lai atangin Messi hian football khelh chu nuam a ti nghal hle a. A u te pahnih Rodrigo leh Matias te bakah a cousin te pahnih - Maximiliano leh Emanuel Biancucchi te nen chuan an khelho nasa thei hle a, Maximiliano leh Biancucchi te chu professional footballer an ni zui a ni.

Kum 4 a nihin Messi hian an khuaa club pakhat Grandoli chu a zawm a, he club-ah hian a pa chu coach a ni nghe nghe a. Kum 6 a tlin chuan a ngaihsan ber Newell’s Old Boys lamah a insuan a, hetah hian kum 6 chu a khel zui a. Kum 6 a khelh chhung hian goal 500 a thun tling teuh hle.

Hemi hun lai vela youth club tha em em mai, hneh theih loh tluka sawi thin, an din kum hming chawia ‘The Machine of ‘87’ an tih zingah chuan a tel a. Messi hian inkhel entu mipuite hmaah chuan half time chhungin ball trick a entir thin a, lawm a hlawh thei hle.

Kum 10 a nihin harsatnain a tlakbuak a, a taksaa tlakchham a neih avangin a thang tha thei ta tlat lo a. An chhungkaw dinhmun a harsa ve hle a, a pa health insurance tih chuan Messi enkawlna tur chu kum hnih a huam pha a, hei hi thla khata $1,000 ang vel zel sengso ang a ni a. A enkawlna hi a hautak tham ve em avangin Newell’s Old Boys chuan a then chu an tumsak ve a, mahse a hnuah chuan an tawpsan leh thung.

Harsatnain tlakbuak mahse inkhelh a thiamna chu a tawp chuang lo a, mi hriat a hlawh chho zel tho a. Buenos Aires club River Plate chuan an enthla vat a, an thiampuipa Pablo Aimar chu Messi chuan a ngaisang em em bawk a. River Plate hian Messi chu lak duh viau mahse an ramah sum dinhmun a tlak chhiat em avangin a inenkawlna chu an tumsak thei si lo a, an inla thei ta lo.

Spain lamah
Catalonia lamah chhungte an nei a, hemi behchhan hian September 2000 khan FC Barcelona-ah trial a nei a. First team director Charly Rexach chuan lak luh nghal a duh viau a, mahse board of director te chuan thutlukna siam nghal chu an hreh deuh thung a. Hemi hun lai hian European club tan Europe pawn lam player, la naupang bawk si lak luh chu thil tih zen zen a nih loh avangin an ngaih a ngam chiah lo a ni.

December 14, 2000 ah Charly Rexach chuan thutlukna hmanhmawhthlak deuh hlek a siam a, lehkha pangngai a awm remchan loh avangin toilet paper-ah Messi contract tur an ziak a. February 2001 ah Messi te chhungkua chu Barcelona lamah an kal a, Camp Nou bul hnaia in pakhatah chuan an lut ve ta rawih a ni.

Spain rama kum khat a awm chhungin Messi hi a inkhel tam lo hle a, transfer chungchang fel hleithei lo vangin friendly match leh Catalan league velah chiah a tel thei a. A khelh tlem avang hian team-ah pawh a inkhuar nghet thei meuh lo a, amah a zakzum a, a tawng tlem bawk nen, a teammate te chuan tawngtheilo emaw an ti hman hial a ni.

Barcelona youth academy La Masia-ah kum khat a awm hnuin Lionel Messi chu February 2002 khan Royal Spanish Football Federation (RFEF) ah an ziak lut ve ta nge nge a. Heta a inziah luh takah chuan inelna hrang hrangah a tel thei vek tawh a, a teammate te nen pawh thianah an insiam chho zui a, Cesc Fabregas leh Gerard Pique te nen chuan an inkawp chho tan a ni.

Kum 14 a tlinin a thang tha thei lo inenkawlna chu a zo chiah a, hemi hnuah hian Messi chu Barcelona youth team ropui ber tia an sawi ‘Baby Dream Team’ zingah a tel chho a, player pawimawh ber pawl a ni zui a ni.

2002-03 khan season a hmang tluan ve tan a, hemi season-ah hian Cadetes A tan game 30 khelin goal 36 a thun a, Messi chu top scorer niin, an team chu trophy pathum a lakpui nghal a, league title mai bakah Spanish Cup leh Catalan Cup te a lakpui a ni.

Hemi season tawp dawnah hian Premier League club Arsenal atangin sawmna a hmu a, Spain ram pawn lam club zinga sawmtu a hmuh hmasak ber niin, Barcelona chhuahsan loh chu a thlang a. A thiante Cesc Fabregas leh Gerard Pique te’n England an pan hnuah pawh Messi hi chu Spain-ah a awm zui ta zel a ni.

Tunah chuan...
Lionel Andrés Messi hi Barcelona player ropui ber tia sawi niin, tun thlengin trophy 34 zet mai a la tawh a, La Liga title 10, UEFA Champions League title 4 leh Copa del Rey 6 a lakpui tawh a. Mimal chawimawina pawh a dawng hnem tawh hle a, Ballon d’Or pawh vawi nga ngawt a dawng tawh a, heng zingah hian vawi li chu kum zawn zata a dawn a ni.

Messi hian European Golden Shoe chu vawi 6 a dawng tawh a, hetiang zat dawng thei awm chhun hi a la ni a. La Liga-ah goal 419 zet a thun tling tawh a, a aia goal thun hnem an awm lo bawk. UEFA Champions League-ah hattrick vawi 8 a siam tawh a, hetiang zat hattrick siam thei dang an la awm lo.

La Liga bikah Messi hian mi goal thun tur vawi 169 zet mai a siamsak tawh a, mi goal thun tur siamsak hnem ber niin, Copa America-ah pawh mi goal thun tur hi vawi 11 chu a siamsak tawh bawk.

Tun season liam taah khan Messi hian UEFA Champions League-ah game 10 khelin goal 12 a thun a, top scorer a ni a. La Liga-a goal thun hnem ber chawimawina, Pichichi award chu vawi 6 a dawng tawh a, 1953 atanga Telmo Zarra record awm tawh chu a nihrual thei chiah bawk a ni.

A chanchin dang thenkhat
Lionel Messi hi khawvela forward lar zingah chuan a hniam ber a tih theih a, feet 5 leh inches 6 chauha sang a ni a. Sang lem lo mahse khelmualah chuan tluktu a nei lo viau thung.

2008 khan FIFA chawimawina sang dawng thei tur zinga thlan tel a ni a, hetianga nominate tawh zingah chuan a naupang ber a la ni.

Argentine forward hi Leo Messi Foundation dintu niin, he pawl hian naupangte hriselna leh zirna lama tihhmasawn kawngah hma an la nasa hle.

Messi jersey number 10 hi 2008 khan footballer ropui tak Ronaldinho atanga a chhawm a ni.

Leo Messi hian Spain tana khel tura sawmna a dawng a, mahse, a pianna ram Argentina tana khelh chu a thlang ta zawk a ni.

August 2018 khan Andres Iniesta a chhuah takah chuan Lionel Messi chu Barcelona captain thar a ni a, hemi thlaah hian Barca chu Supercopa trophy lakpuiin, a captain na hnuaia thla khat pawh an khelh tlin hmain trophy a lakpui nghal a ni.

Messi hian Barcelona tan goal 600 a thun tling tawh a, Catalan club lian tana goal thun hnem ber a ni.

Copyright © inkhel.com 2024. All rights reserved.