29 Sep 2018 12:12

inkhel

Lewis Hamilton a inthlahdah dawn lo

Tun kar tawpah Formula One intlansiak a awm leh dawn a, driver zinga fal taka hmahruaitu ni mek Lewis Hamilton chuan Russian Grand Prix-ah inthlahdah a tum loh thu a sawi.

Season kal mekah vawi 6 chauh intlansiakna tur a awm tawh a, Mercedes driver Lewis Hamilton chuan point 40 ngawtin hma a hruai mek bawk a. Hamilton hi champion tluka ngaih theih a ni ber tawh mai a, heti chung hian inthlahdah a la tum lo hle a ni.

Singapore Grand Prix-a Hamilton a chak ber phei kha chuan amah hnaih bertu Sebastian Vettel tan chuan beisei a bo tawh hle a. Vawi ruk intlansiak tur la awmah hian Hamilton hi vawi thum a chak leh a nih chuan a champion thei tawh dawn a, Vettel chuan eng result pawh nei mahse a khum thei tawh dawn chuang lo a ni.

A dinhmun chiang tluka ngaih theih ni tawh mahse Hamilton chuan season tan tirha a rilru put ang tho kha a pu zel dawn tih a sawi a ni.

“Title la tluk tih vel hi innghahna tlak a ni ka ti thei lo a, kut lehlamah trophy vuan tawh tih vel ai chuan kut khinghnih ngeia trophy vawn theih ka duh zawk a. A hma pawha ka lo sawi tawh angin intlansiak apiang hian a hnuhnung ber tur ang maiin thahnem ngai em em reng ila a tha ber a ni,” tiin Hamilton chuan a sawi.

A sawi zelnaah, “Kawng a la tawp mai lo a, vawi 6 ngawt intlansiakna tur a la awm a. Vawi 6 intlansiak hi a theuneu lo hle a, point tam tak a la hmuh theih tlat a, chuvangin season tawp hi chuti taka hnai a la ni bik lo,” a ti a.

“Team member zawng zawngte chu rim takin an thawk mup mup reng hlawm a, car in hma a sawn theihna tur an ngaihtuah zel bawk a. Intlansiak hmabak la awmah te hi an chona thar chi hrang hrang kan la hmachhawn zel dawn a, chutiang atan chuan inrin reng a pawimawh a ni,” tiin a sawi bawk.

Kumin chhungin intlansiak tam zawkah Hamilton chuan Vettel te aia car chak lo zawk khalh mahse dinhmun chungnung zawkah a ding ta fo mai a, hei vang hian cho sual pawh a awl viau dawn a. A inthlahdah ngai lohna tak te hi tuna hma a hruai fal theihna te pawh hi niin a ngaih theih a ni.