Bayern Munich striker Robert Lewandowski leh an winger Kingsley Coman-te chu training naah an insual thu Bayern manager Niko Kovac chuan a sawi.

Chanchinbu mite chuan Lewandowski leh Coman-te hi an an insual niin an lo ziak tawh a, Bayern manager chuan he thu hi a dik ngei a nih tih a sawi chianga, player hnihte chun hrem zui an nih dawn loh thu a sawi tel bawk.

Kovac chuan, “Robert leh Coman-te inkarah tharum thawhna a thleng ngei a, mahse training zawhah kan pathumin titina hun neiin, engkim sawi fel a ni tawh. An pahnihin thupha an chawi ve ve a, an inchhir hle bawka, chuvang chuan hrem zui an ni dawn lo; pawisa chawi tir lam pawh engmah a awm dawn lova, hemi chungchuang hi khar a ni tawh,” a ti.

Lewandowski hi tunah hian Bundesliga top-scorer a ni mek a, goal 21 a khung tawh. Coman erawh tun season-ah hliamin a tlakbuak zeuh zeuh avangin duh angin a inkhel tam lo hle a, Bayern tan hian vawi 22 chiah a la inlan a ni.

Bayern hian kar liamta khan Borussia Dortmund chu 5-0 laia hnehin Bundesliga hmahruaitu an ni nghala, Dortmund ai hian point khatin an sang zawk. Tun season-ah Bayern an tha fal thei bik lova, Dortmund nen inum tawk em em in Bundesliga lamah pawh champion tur a la sawi theih loh.