Barcelona manager Quique Setien chuan tun hnaiah Robert Lewandowski che tha hle mahse, Barcelona captain Lionel Messi erawh a tluk loh thu a sawi.

Barcelona leh Bayern Munich te hi zanin zalaiah Champions League quarter-final ah an intum dawna, heta chak zawk zawk hi champion tura rinkai ber an ni a tih theih hial awm e.

Polish goal thun khawl Lewandowski hian tun season-ah Bayern tan game 44 khel tawhin goal 53 lai a khung tawha, Bayern leh Germany defender hlui Lothar Matthaus chuan tunkar khan Lewandowski hian Messi a khum tawh niin a sawi.

Barcelona manager Setien erawhin Matthaus-a sawi hi a pawmpui lova, Messi chu hnial buai theih lovin, Lewandowski aia player tha a nih thu a sawi.

Setien chuan, “Lewandowski hi player tha leh ropui ni mahse Messi-a level-ah erawh a awmin ka hre lova, chu chu a chiang viauin ka hria. Lewandowski hi tunah a che tha hle a, Champions League-ah pawh goal 13 a khung tawhin, a team mate ten an thlawp tha hle.

“Mahse Messi pawh a che tha lo bik lova, Napoli lakah pawh a kan hmuh kha. Heng ang player te inkhel kan la en thei hi a lawmawma, kan hlut tur pawh a ni. Messi hian min chakpui thei tih ka hria a, mahse team chaknaah hian keichu ka innghat zawk.

“Messi hi tanpuia, ball pek a ngaia, a mah chauh pawhin goal a siam chhuak theia, amaherawh chu team tel lo chuan tun ai hian a hniam ngei dawna, chutiang chiah chu player tha dang zawng zawng te awm dan tur pawh a ni,” a ti.