Tun season Bundesliga game hnih chiah a khelhpui hman tihin Erik ten Hag chu Bayer Leverkusen chuan an ban thut mai. United boss hlui chuan a thil tawn chu thil thleng ngai lo a nih thu a sawi bakah, club hotute chuan amahah rinna an nghah loh thu a sawi chhuak.
Manchester United manager hlui hian Leverkusen chu tun season-ah game 3 chiah a la khelhpui a, Xabi Alonso-a'n Real Madrid a pan avangin Leverkusen chuan an la lut a, kum 2 daih contract an ziahpui.
DFB Pokal match-ah fourth division Sonnenhof Grossaspach chu 4-0 in an hneh a, Bundesliga match hmasa berah 2-1 in Hoffenheim lakah an tlawm. Inrinni khan Werder Bremen nen an inhmachhawn a, 3-1 a hma an hruai hnuaah 3-3 in an inhnehtawk. Thawhṭanni khan Leverkusen chuan ten Hag an ban ta thut a ni.
Tun nipui bazarah khan Leverkusen chuan player an hralh teuh mai, chung zingah chuan an player mawimawh Jeremie Frimpong leh Florian Wirtz te bakah, an captain Granit Xhaka pawh a tel.
Kum 2024 October thla khan Dutch coach hi Manchester United chuan an ban a, Premier League table-ah 14-na an nih mek lai a ni. Old Trafford-a hun a hman chhungin Carabao Cup leh FA Cup a chawipui a ni.
Ten Hag chuan a agency SEG Football hmangin hetiang hian thuchhuah a siam.
"Bayer Leverkusen hotute thutlukna thawhṭannia ka hria kha chu mak ka tiin min barakhaih hle.
"League game hnih lek khelh hnua hetianga coach ban hi thil thleng ngai lo a ni.
"Tun nipui bazarah an hlawhtlinna player ṭha tak tak te chuan club an chhuahsan a, team thar din leh tur chuan fimkhur taka hma lak a ngai a, hun ka mamawh bakah ka chunga rinna an ngah a ngai.
"Coach thar reng rengin hun an mamawh ṭhin. A tum dan anga team a kaihhruai theih hun nghah te a ngai a, khelh dan phung a duan anga khelh chhuah theih hun te ngah a ngai ṭhin.
"He hna ka zawm tirh khan ka ngaihtuahna ka seng nasa em em a, tha leh zung pawh a heh em em bawk. Chutih laiin club hotute chuan hun min pe lo a, ka chungah rinna an nghat lo a, ka lo lut ta kher kher kha ka inchhir khawp mai.
"Ka chunga rinna nghat ngam tur an ni. Ka coaching career-ah season pumin hun ka hmang tlangpui ṭhin a, chu chuan hlawhtlinna min chantir ṭhin bawk.
"Ka chunga rinna nghat reng reng chu lawmman ka lakpui a, hlawhtlinna leh trophy ka lakpui ṭhin.
"Engpawh nise, a tawp berah chuan, Bayer Leverkusen supporter te chungah lawmthu ka sawi a, Leverkusen hian season hlawhtling takin hmang se tih hi ka duhsakna a ni."