Zirtawpni zan lai khan Bundesliga inkhelah Bayer Leverkusen chuan Mainz an mikhual a, 2-1 in Leverkusen hian hnehna changin, record thar an siam.

Tun season-ah Leverkusen hian competition hrang hranga game 33 an khelh tawhah tlawm an la nei lova, German football history-a tlawm nei lova competition hrang hranga kal tluang rei ber record thar an siam a, Leverkusen hi tun season ah Europe league lian panga-a tlawm la nei lo awmchhun an ni tawh.

Mainz lakah hian Leverkusen tan Granit Xhaka leh Robert Andrich te chuan goal an khung a, Mainz goal khat hi Domonik Kohr-a thun a ni a, 80mins-ah Mainz player Jessic Ngankam hnawh chhuah niin, Leverkusen hian point 3 hlu tan an hlawhchhuak.

Leverkusen hian Bundesliga table lera an dinhmun an sawh nghet zel a, khelh 23 hnuah point 61 hlawhchhuak tawhin pahnihnaa awm Bayern Munich nen point 11 laiin an inthlau tawh a, mahse Leverkusen hi Bayern aiin khelh khatin an khel tam zawk.

Mainz nena an inkhelah Leverkusen hian inkhelh tan atanga 3mins-ah hma an hruai nghal a, Arsenal captain hlui Xhaka chuan box pawn atangin mawi takin goal-ah ball a pet lut a, si khat faiin Leverkusen hma a hruaipui.

Leverkusen hian hma hruai hma viau mah se, hma an hruai atanga minute 4 hnuah mikhual lam Mainz in an si phurh an sut a, free kick atangin Mainz lamin Leverkusen box ah ball an vawrh lut a, hei hi Widmer-a’n a lo tauh let hnuah Kohr chuan goal-ah a tauh lut ve leh a, 1-1 a ni.

70mins an khelh tlin hma deuhin a vawi hnih nan Leverkusen in hma an hruai a, Andrich chuan box pawn atangin goal-ah ball a pet a, Mainz goalkeeper Hradecky tan man harsa tur nilo mah se Hradecky hian a man sual a, ball hi goal-ah a lut chhunzawm a, 2-1 in Leverkusen an chak ta a ni.