Bayer Leverkusen chuan Kasper Hjulmand chu an head coach thar a nih thu an puang.

September ni 1 khan Leverkusen chuan an coach Erik ten Hag an ban a, ani khan game 3 chiah a enkawl hman a, a lakah rinna an nghat ngam lo a, an ban ta a ni.

Euro 2024-a Denmark an tlak hnu khan kum 52 mi Hjulmand hian hna a la nei leh lo a, German club-ah hian kum 2027 thleng atan contract a ziak ta a ni.

Hjulmand hian kum 4 chhung Denmark team a enkawl a, Euro 2020-ah khan semi-final a luhpui a, semi final-ah khan 2-1 in England an hneh lo. Denmark a enkawl chhungin match 54 a khelhpui a, vawi 32 hnehna a chanpui a ni.

Xabi Alonso chuan Real Madrid a pan tak avangin a aiah Erik ten Hag an la a, Ten Hag hian DFB Pokal-ah hnehna a chanpui nghal a, mahse Bundesliga match-ah 3-1 in Hoffenheim a hneh lo a, 3-1 a Bremen laka hma an hruai hnuah 3-3 in an inhnehtawk leh bawk a, kha avang khan an ban ta a ni.

Tun nipui bazar inhawn lai khan Leverkusen hian player pawimawh tak tak an chan. Jeremie Frimpong leh Florian Wirtz te chuan Liverpool an pan a, captain Granit Xhaka chuan Sunderland a pan a, Jonathan Tah chuan Bayern Munich panin, Piero Hincapie chuan Arsenal a pan bawk.

Tun season Bundesliga-ah khelh 2 atangin point 1 chiah an la hlawhchhuak a, table-ah 12-na an ni mek.