British boxer hlui Lennox Lewis chuan December ni khata boxing world heavyeight title fight awm turah a chak zawk tur sawi a harsat thu a sawi.

December ni khat hian Deontay Wilder leh Tyson Fury-te chuan world heavyweight title fight an nei dawn a, Los Angeles-ah Wilder chuan British boxer Fury lakah a WBC kawnghren humhim a tum dawn. Combat sports khawvelin a nghakhlel em em a, sum pawh lut hnem hle tura ngaih a ni.

Lennox Lewis chuan, “Klitschko leh Fury an in hnek tum khan Klitschko khan Fury kha khatiang taka hriatthiam har leh beih har a nih kha a ring lova, khatiang tak khan Fury kha a chet ran a beisei lovang. Wilder erawh boxer danglam tak a ni a, Fury lakah beisei tur a hriat ka ring.

“Wlder hi a chak em em a, khawiah pawh hnek fuh che sela hliam i tuar ngei ngei ang. Fury hi a knock out thei lo a nih vaih chuan inhnek tura a inrin hle a ngai ang. Fury-a ke hi a che rang em em a, Wilder hian chu chu a khelhpui thei dawn em tih chu kan hmu dawn.

“He fight hi sawi lawk a harsa em em a, boxer pahnihte an chakin an thiam dun em avangin an in hnek hma chu thil thleng tur a hriat loh,” a ti.

Wilder leh Fury-te inhnek tur hi a inmunna a rei tawh angreng hle a, an incho dun bawka, boxer hnihte hian combat sports ngainatute chu boxing game hmuhnawm tak min chhawpchhuahsak ngei a beiseiawm hle a ni.