Leicester striker thar Okazaki.

27th June 2015, 05:06AM

Leicester City chuan Mainz atangin Japanese striker Shinji Okazaki an lalut a, amanah £7m vel an seng a kum li daih contract an ziahpui.

Contract a ziahfel hnuin Okazaki hian, "He club-a ka lut thei hi ka lawm khawp mai. Premier League-a khelh hi ka duhthusam a ni a Leicester City tan hian ka theihna zawng zawng ka hlan ang."

"Ka thiamna pholang turin theihtawp ka chhuah dawn a, fans-te tan goal tam tak khung khung ka tum bawk ang." tiin a sawi.

Okazaki hian Japan national team tan game 93 khelin goal 43 a khung tawh a, World Cup pawh tum hnih a khel tawh.

Japanese club Shimizu S-Pulse atangin bul alo tan chho va, kum 2011 January thla khan German club Stuttgart-in kum thum leh a chanve daih contract ziahpuiin an lalut a kum 2013 July thla khan Mainz-in an lalut veleh.

Mainz tan hian Bundesliga-ah game 65 khelin goal 27 a khung hman a, Foxes-ah hian Leonardo Ulloa, Jamie Vardy leh Andrej Kramaric-te ho nen khelhna hmun inchuhin an inel ang.

Leicester hian tun nipui transfer hun hawn mekah player pathum an lalut ta a, Okazaki hma hian Christian Fuchs leh Robert Huth-te an lo lalut tawh a ni.

Copyright © inkhel.com 2024. All rights reserved.