Leicester City chuan an player pawimawh tak Riyad Mahrez chu Manchester City lakah an chana, a thlaktu tur an la fel.

Algerian mi Mahrez thlak tur hian Leicester chuan AS Monaco atangin winger Algerian mi tho Rachid Ghezzal an laluta, a man zat tarlan a ni lo.

Kum 26 mi Ghezzal hian King Power Stadium-ah kum li daih contract a ziaka, a pu hlui Lyon lama a lo hrawn tawh Cluade Puel nen an thawkdun leh dawn ta a ni.

Foxes manager Puel chuan Ghezzal an lakluh chungchang hi sawiin, “Rachid hi Leicester City Football Club –ah ka lo lawm a, kan tana player tha leh tangkai tak a ni chho dawn a ni,” a ti.

“Lyon academy-a a awmlai atangin a that zia ka lo hre tawha, Premier League-ah eng nge a an dawn ka hmu chak tawh hle,” a ti bawk.

Ghezzal hi kumin nipuia Foxes player thar pangana a ni a, Jonny Evans, James Maddison, Ricardo Pereira leh Danny Ward-te hnung zuiin, King Power Stadium lamah a inpu lut ve ta a ni.

Algeria tan vawi 13 a inlan tawha, Lyon-a a awm laiin game 110 khelin goal 14 a khung bakah assist 20 lai a nei bawk.

Kum 2017 khan a hunlaia French champions Monaco chu a free-in a zawm a ni. Monaco tan hian league game 26 a khel tawha, goal hnih a khung tawh bawk.