Helicopter chesuala Leicester City football club neitupa Vichai Srivaddhanaprabha leh mi dang pali te thih phahna kha a bulpui ber chu helicopter khawl chian loh vang niin UK Air Accidents Investigation Branch (AAIB) chuan an sawi.

October 27 khan Leicester City khelmual King Power Stadium atangin Leicester City football club neitupa Vichai Srivaddhanaprabha leh mi dangte chu helicopter hmangin an thlawk chhuak dawn a. Boruaka an kan hnu lawkah helicopter chu a buai zui a, leia a tlak rualin a alh nghal a, a chhunga chuangte chu chhan theih an ni ta lo a ni.

UK Air Accidents Investigation Branch chuan helicopter tlak chhan hi an chhui chiang a, AW169 helicopter hnung lam vir leh pilot in a control na inzawmnaah chuan fel lo a awm niin an sawi a, he lai chiang lo vang hian helicopter chu thunun theih lohin a vir vak a, a tla zui ta niin an sawi a. Helicopter chetsualna hmunah hian a khawl fel lo lai pawh chu an chhar zui nghe nghe a ni.

Vichai Srivaddhanaprabha bakah hian a hnuaia thawk pahnih Nusara Suknamai leh Kaveporn Punpare te bakah pilot pahnih Eric Swaffer leh Izabela Roza Lechowicz te chu helicopter ah hian an chuang a, an vai hian an nunna an chan vek a ni.

AAIB chuan, “Kan chhui chiannaah a hnung vir fel loh vangin helicopter hi thunun theih lohin a awm a, hei vang hian chetsualna hi a thleng ta niin kan ngai,” tiin an sawi.

Kum 61-a upa Srivaddhanaprabha kha Thailand rama retail company lian King Power International Group hotupa a ni a. 2010 khan Leicester City chu a lei a, hetih lai hian Leicester hi England rama second division, Championship lamah an la awm lai a ni.

Thai mogul Vichai Srivaddhanaprabha hnuaiah Leicester chuan hma an sawn chho a, 2015-2016 season ah khan Premier League lamah an kai chho thei ta hial a. Premier League lama an kir leh hian mi chuan che thei vak lo tura an ngaih laiin an champion zui nghal a, Foxes chet dan hian football khawvel chu an barakhaih chiang hle a ni.