Leicester-ah Albrighton a nghet

30th July 2021, 11:07PM

Leicester City chuan an winger Marc Albrighton chu contract thar an ziahpuia, Albrighton-a contract thar hian kum 2024 June thla thleng a daih a ni.

Albrighton hi kum 31 mi a ni a, a naupang tawh lova, mahse season liamta khan Leicester tan competition zawng zawngah vawi 42 a la inlan theia, Foxes hian chhawr zel pawh an la tum viau niin a lang.

Leicester hian Albrighton hi kum 2014 khan Aston Villa atangin an leia, kum 2015-16 season-a Leicester-in Premier League title an lak tum pawh khan Albrighton hi an player pawimawh ber zinga mi a ni.

Foxes tana vawi 253 khel tawh Albrighton chuan contract thar a ziah chungchang sawiin, “Contract thar ka ziak thei hi ka lawma, he club hi kum tin maia nasa tak hmasawn thin a ni. Club nuam tak a ni a, hmasawn lam an pan zela, an zinga ka tel thei hi ka lawm hle a ni,” a ti.

English winger Albrighton hi Aston Villa academy chhuak a ni a, Leicester a pan hma lawk hian Wigan lamah loan-in a khel zuai tawh. England U20 leh U21 player hlui ni mahse England senior team tan vawi khat mah Albrighton hi a la inlan lo a ni.

Copyright © inkhel.com 2024. All rights reserved.