Premier League club Leeds United chuan, an goalkeeper Illan Meslier chu kumin nipuia an hralh dawn a nih chuan, a manah pound maktaduai 40 an duh thu Football Insider chuan a tarlang.

Leeds hi Premier League atanga an tla a nih chuan Meslier hi a chhuak ngei dawn nia sawi a ni a, mahse Leeds hian kum 23 mi hi man tlawm taka hralh an tum lo tih a lang.

Leeds hian kum 2021 mai khan Meslier hi kum nga daih contract thar an ziahpui a, an hnenah French keeper hian contract a la neih rei avangin Leeds hian pound maktaduai 40 aia hniamin hralh an tum lo nia sawi a ni.

Meslier hian Leeds tan Premier League-ah game 100 chuang a khel tawh a, Premier League-a goalkeeper game 100 khel tling thei naupang ber a ni nghe nghe a, tun season-a save neih hnem lamah parukna dinhmun a luah mek bawk.

Meslier hi keeper naupang theihna sang tak nei a ni a, France number one la ni thei tura rin a ni a, la naupang mah se tawnhriat a neih that tawh avangin Premier League club lian zawk te nena sawizawm a lo ni fo tawh.

Chelsea, Manchester United leh Tottenham te chuan Meslier hi an duh vek niin chanchinbu mite chuan an tarlang a, mahse Leeds hi Premier League atanga an tlak leh tlak lovin, Meslier-a hmalam hun a hril thui dawn niin a lang.

Leeds hian Premier League season kal mekah khelh 30 atangin point 29 an hlawhchhuak tawh a, tunah hian 16-naah awm mekin, Meslier hian an game khelh tawh zawng zawngah si ban a la nghak veka, clean sheet vawi nga a nei tawh a ni.