16 May 2019 08:59

bakteaJr.

Mizo tlangval

​Leeds hneha Playoff final khel tur Derby County

EFL Championship Playoff semi-final second-leg inkhelah Leeds United chuan Elland Road-ah Derby County an lo mikhuala, Derby hi khual mualah 4-2 a chakin, aggregate-ah 4-3 in an chaka, Wembley Stadium-ah Playoff semi-final khel turin an inpet tling.

Second-leg ah hian Leeds tan Stuart Dallas chuan goal hnih a khunga, Derby tan Jack Marriott chuan goal hnih khungin, Mason Mount leh Harry Wilson-te chuan goal khat ve ve an khung bawka, Wilson-a goal hi penalty spot atanga khug a ni. Team hnihte atangin player pakhat ve ve hnawhchhuah an ni a, Leeds player Gaetano Berardi leh Derby player Scott Malone-te chu player hnawhchhuah te an ni.

First –leg ah Leeds hi Derby mualah si khat faiin an chak tawh a, second leg-ah pawh hma hruai hmasa leh mahse Derby hian an lehthal. Derby manager hi Chelsea legend Frank Lampard a ni a, inkhel a chawlhsan hnuah tun season atangin manager hna a thawk tan a Derby hi a club enkawl hmasak ber a ni nghe nghe.

Derby hian final-ah Aston Villa chu England-a stadium lian ber Wembley Stadium-ah an hmachhawn dawn a, Aston Villa hian West Brom hnehin final an lo lut fel tawh a ni.

Final khel tur te hian ngaihven hlawh zual chhan pakhat an nei a, Chelsea legend pahnih Lampard leh John Terry-te an inhmachhawn dawn. Sawi tawh angin Derby manager hi Lampard a ni a, Aston Villa assistant manager hi Chelsea captain hlui John Terry a ni bawk.

Lampard leh Terry-te hun rei tak chhung Chelsea-ah an khel dun a, Terry hi captain niin Lampard hi vice-captain a ni reng thin. An inkawmngeih zia chu inkhel ngaina mi tan hriat loh chi a ni lova, Chelsea-a trophy an chawi pawhin an pahnihin trophy an dawm dun kher thin a nih kha.

Championship final-ah erawh thian tha pahnih an inhmachhawn a ngai dawn a, chanchinbu mite lam pawhin he inkhel tur theh lar nan an hmang nasa nghal hle. Norwich leh Sheffield United-te chu Premier League khel turin an tling tawh a, pakhat la chho tur zawn mek niin Derby emaw Villa chuan Premier League an khel ngei dawn a ni.