19 Oct 2018 05:23

inkhel

LeBron telna Lakers in Blazers an hneh lo

LeBron James chuan vawi hnih a dunk a, point 26 a score bakah rebound 12 a la a, che tha viau mahse Los Angeles Lakers chu NBA season bul tannaah a chakpui zo lo.

Los Angeles Lakers leh Portland Trail Blazers te chu season thara an game hmasa berah an inkhel a, Portland hi 128-119 in an chak a, LeBron James chuan Los Angeles hi a chhan thei ta lo a. Blazers hian a zawnin Lakers hi vawi 16 chu an hneh ta chiah a ni.

Tun kar tirah khan Trail Blazers neitu Paul Allen chu a thi a, Lakers nen an inkhelh lai pawh hian court sira a thutna thinah chuan ‘Rip City’ baseball cap leh rose par pakhat an dah a. Thawhtanni khan Microsoft dintu pakhat ni bawk Paul Allen chu non-Hodgkin’s lymphoma vangin Seattle khawpuiah a thi a. Inkhel tan hma hian kum 65-a upa Paul Allen thlahna atan ngawi rengin an ding a ni.

Inkhelh tan atangin mi thar LeBron James chu mipui mit fukna ber a ni nghal a, a tir lamah James hian a dunk nghal a, Moda Center-ah thawm a tha hle a. Lakers in $153 million contract an ziahpui hian first quarter-ah point 13 thunin Lakers chu 25-15 in hma a hruaipui a.

Portland chuan Stauskas zarah Lakers chu an lehthal chho a, 46-40 in hma an hruai ve leh thung a, Stauskas hian point 16 chu quarter hmasa berah hian a thun hman a. Chawlhlawk a nih chuan Blazers hian 65-63 in hma an la hruai hram a.

An inhnehtawk chho hle a, third quarter tawp dawn hnaihah Kuzma dunk zarah Lakers chuan 79-78 in hma an hruai a. Blazers chuan rawn lehpel leh mahse Hart chuan 3-pointer hmangin Lakers hi 93-91 in hma a hruaipui ve leh a, third quarter a tawp zui a.

Stauskas chuan 3-pointer hmangin Portland chu 107-100 in hma a hruaipui ve leh thung a, minute 7:22 chauh a awm tawh a. Hemi hnu hian McCollum pawhin 3-pointer hmangin an hmahruaina a rawn belh ve leh bawk a, 114-104 a ni tawh a, an inthlau tan hle a. Caldwell-Pope chuan 3-pointer bawkin an inkar rawn tizim ve leh mahse a tawp thlengin Lakers hian an umpha ta lo a ni.