Boston Celtics star Kyrie Irving chuan Cleveland Cavaliers superstar LeBron James nen khelh dun leh theih chakawm a tih thu sawiin, hetiang hun hi a thleng leh lo ang tih a sawi theih loh a ti.

Kyrie Irving chuan nikum August thla khan Cavaliers atangin Celtics hi a zawm a. Kum 26-a upa guard hian tun hnaiah offensive role chan tam ve a duh thu a sawi a, Boston-ah hian a season hmasa berah a average chu 24.4 a ni.

A team mate thin LeBron James chu free agent ni thut thei dinhmunah a ding mek a, team thenkhat chuan James hi an thlithlai uluk nghal hle a, heng zingah hian Boston Celtics chu a langsar pawla sawi an ni.

Irving chuan Thawhlehni khan chanchinthar lakhawmtute hmaah James nen hian an khel dun leh maithei niin a sawi a, engmah thu chiang erawh a awm lo.

“Basketball khawvelah hian thil chi hrang hrang ka tawng hnem ve ta hle a, thil tam tak ka hmuin ka zir chhuak ve tawh a. Tunah pawh hian James dinhmun hi chiang a awm lo a, eng thil pawh thleng thei a ni a, kan khel dun leh lo ang tih a sawi theih loh,” tiin Irving chuan a sawi.

A sawi zelnaah, “Management lampang chanpual a ni a, anniin engtin nge hma an lak dawn ka hre lo a, kan team tana tha ber tur an ngaihtuah a, an hre ber bawk a. Kan tana tha tur a nih dawn chuan LeBron James hi an lalut ang a, tul an ti kher lo thei ve bawk a. Kan tih theih ber chu lo ngaihchan a ni mai,” a ti bawk.

2011 NBA Draft-ah khan Cleveland Cavaliers chuan Kyrie Irving hi number one overall ah an thlang a. A average chu game tinah 21.6 niin Cavaliers a season 6 a awm chhungin All-Star team 4-ah a tel hman a ni.