22 Nov 2018 04:57

inkhel

LeBron James te’n Cavaliers an hneh

LeBron James chu Lakers a zawm hnuah Cleveland lamah a kir leh a, a team thar chu a team hlui lakah a chakpui a, James hian lawm a hlawh hle.

Los Angeles Lakers chuan Cleveland Cavaliers chu 109-105 in an hneh a, he inkhelah hian LeBron James chuan point 32 a score a, rebound 14 a lak bakah assist 7 a nei bawk a. Lakers hi tun hnaia game 7 an khelhah vawi 6 an chak ta chiah a, Cavaliers erawh an chet chhiat a kal tluang rih a ni.

July thla khan kum 33-a upa playmaker hian Cavaliers chhuahsanin Lakers a zawm a, tun tum hi Lakers a zawm hnua Cleveland-a a kir leh hmasak ber niin, 2010 a Cleveland chhuahsan a Miami lam a pan nen chuan boruak a inang tawh lo khawp mai a. Khami tum kha chuan fans te chuan an au el hluah hluah a, tun tumah erawh an lo lawm nasa viau thung a ni.

“Fourth quarter-ah kan defense kan ti tha a, Cavaliers khan an khel tha khawp mai a, mahse a tawp thlengin inthlahdah miah loin kan tang tlang thei a. Player la naupang tak tak ni hlawm mah ila hma kan sawn ve zel a, Cavaliers pawh kan dang hlawhtling thei a ni,” tiin James chuan a sawi.

An lo lawm an chungchang sawiin LeBron chuan, “Helai hmuna rawn kir leh a min lo lawm dan han hmuh khan a ropui ka ti a, ka tan mai pawh ni lo, kan chhungkaw tan chuan a hlu tak zet a. Cleveland-a kum 11 ka khelh tawhah khan court chhung leh pawnah pawh theihtawp ka chhuah char char a ni,” a ti.

Hmun dangah Cameroonian center Joel Embiid chuan New Orleans palian Anthony Davis chu khumin Philadelphia 76ers chuan Pelicans chu 121-120 in an hneh hram a ni.

Embii chuan point 31 a thun a, rebound 19 a lak bakah block 2 a nei a, Anthony Davis chuan point 12 a thun a, rebound 16 lain steal 5 leh block 5 a nei a. Australian star Ben Simmons chuan 76ers tan point 22 a thun a, rebound 8 lain assist 7 nei a. New Orleans tan E’Twaun Moore leh Jrue Holiday te chuan point 30 ve ve an thun.