NBA superstar LeBron James chuan basketball court chhungah chauh ni lo, pawn lamah pawh mi entawntlak a nihzia a tilang a, naupang dinhmun chhe zawkte tana sikul an din chu a hawng.

I Promise School hi LeBron James-a chawr chhuahna khua Akron, Ohio ah an din a, third-grade leh fourth-grade naupang 240 luh theihna tur niin, LeBron James Family Foundation leh Akron Public Schools tang kawpin an din a ni.

Vawi thum ngawt NBA champion lo ni tawh James chuan, “An tan hian thil tha engkim tihsak kan duh a, a theih ang chinah chuan naupang dangin an neih theih leh an tih theih ang apiang chu tihpui kan tum a ni,” a ti.

Cleveland Cavaliers atanga Los Angeles Lakers zawmtu, $154 million (£116 million) man vel kum li chhung contract ziaktu James hian sikul hi a theih ang angin a pui thin ang a, zirna lampang bik chu school board in an buaipui dawn a. James hian he sikul zarah chhungkaw dinhmun harsa zawka seilian naupangte chuan zirna pangngai an neih theih a, puitling taka an chhuah theih a beisei thu a sawi.

LeBron James hian a naupan laiin duh angin lehkha a zir thei lo thin a. An chhungkuain lirthei an neih zawh loh avangin ni 83 zet chu sikul a kal theih loh phah a. Hemi kum hian mumal takin lehkha pawh a zir thei ta lo a, chhungkaw thenkhat chuan a theih ang angin an puibawm a, a kum lehah chuan basketball a khel tan a ni.

James chuan, “Ka tan chuan sikul khan awmzia a nei vak lo thin a. Ka hun hman dan kha a ho thei em em mai a, ni khat kha eng vak mah ti loin ka hmang ral vel mai mai a, zanah lah chuti hlauh bawk. Awmze nei lo takin ka hun tam zawk ka hmang a, tum mumal ka nei bawk si lo a, ngaihtuahna kha a tawi hle thin,” a ti.

“Keimah ang bawka naupang an awm ve hi ka duh lo a, kum 8, kum 9 bawr vel nih lai atanga phurrit takin a delh ve hi ka duh lo a. Hetiang naupangte hian eng ang chiah nge an paltlang tih hi ka hre chiang ve viau a ni,” a ti bawk.

A tetlai hian bike neih tangkaizia a hre chiang a, kawtthler hlauhawm tak tak, hmun ralmuang lo deuh deuh paltlangna atan a tangkai a, zalen zawka a awm ve theihna a ni tih hriain, an sikul dina kal naupang zawng zawngte chu thirsakawr an pek vek tur thu a sawi a ni.

Sikulah hian ei tur an pe thin dawn a, hei bakah hian an rilru hahna te, an chhungkuaa harsatna an tawhte leh rilru hahdam lohna an neih angte chu chin fel an tum thin dawn a. Khawsak harsa zualte chu theih ang anga chhawmdawl an tum bawk a. Naupang chhungte, hnathawh nei lote chu hna an zawnpui thin dawn a ni.

2015 khan James hian zirlai, chhungkaw dinhmun fuh lo 1000 te’n college an kal theihna turin hma a lo la tawh a. 2011 atanga bul tan, Wheels for Education programme atan pawh a sum a thawh nasa hle a, he programme hmang hian sikul naupangte mamawh tur, computer leh bike te an tumsak thin a. Zirlai naupangte’n result tha zawk an neih theihna turin theihtawp an chhuahpui thin.