20 Nov 2019 05:13

inkhel

LeBron James-a’n record a siam belh

LeBron James chuan record a siam teuh tawh a, record thar a siam belh zel bawk a, NBA team 30 laka triple-double nei kim vek thei awm chhun a la ni.

Los Angeles Lakers leh Oklahoma City Thunder te inkhelah LeBron James chuan point 25 a score a, rebound 11 a lak bakah assist 10 a nei bawk a. Lakers chu 112-107 in James hian a chakpui bakah basketball player zingah chuan NBA team 30 lakah triple-double a nei kim thei hmasa ber a ni.

Kum 34-a upa LeBron James hi Los Angeles Lakers coach Frank Vogel chuan a fak zui nghal a, hetih lai hian James hian Staples Center-ah hian thil ropui tak a puitlin a ni tih hi a hre mai lo thung.

James chuan, “Khatiang record thar kha ka siam tih ka inhre lo reng reng a. Coach Vogel kha a rawn kal a, min lawmpui thu a rawn sawi a. Khatianga a rawn tih khan a tirah phei chuan a uang emaw ka lo ti zawk a. Turnover vawi 7 ngawt ka neih avangin min rawn fiam emaw ka ti phawt a ni,” a ti.

“A hnuah chuan NBA huang chhunga team 30 te laka triple-double nei vek thei hmasa ber ka nih thu a sawi a. Team zawng zawng laka hetiang tih theih chu a ropui a tih thu te a sawi a, kei lah chuan ka lo hre der si lo a. Chutia a sawi takah chuan a lawmawm ka tih thu chu ka sawi ve ta chauh a ni,” a ti bawk.

A record thar siam chungchang hi LeBron James chuan a sawi thui zui vak lo hle a, chutih rualin Frank Vogel zawk chuan sawi nuam a ti hle.

Vogel chuan, “A makin a awihawm lo rum rum zawk a. James chuan hetiang record a neih theih chhan chu NBA huang chhunga a awm rei tawh vang a ti maithei a, hei hi a dik tho rualin amah hi a thiam em avangin a ni zawk tih chu kan hre tlang vek a ni,” a ti.

“James hi player ropui tak, tha chungchuang zet a ni a, hetianga team 30 te laka a che thei hian thu tam tak a sawi a. He record hi rawn nihrual ve thei hi an awm tawh pawhin ka ring lo,” a ti bawk.