07 Mar 2019 05:08

inkhel

LeBron James-a’n Michael Jordan a lehpel

LeBron James chuan NBA khawvela point score hnem lamah Michael Jordan chu a lehpel ta a, palinaah awmin a chungah hian Kobe Bryant, Karl Malone leh Kareem Abdul-Jabbar te chiah an awm tawh a ni.

Los Angeles Lakers leh Denver Nuggets te inkhelh tumin LeBron James hian point 31 a thun a, a vaiin point 32,311 a score tling ta a, point 32,292 score tu Michael Jordan chu a lehpel thei ta a. A chung chiahah hian pathumna dinhmun luahtu Kobe Bryant awmin, point 33,643 a score tling a. Pahnihnaa awm Karl Malone chuan point 36,928 a score a, pakhatna Kareem Abdul-Jabbar chuan point 38,387 a score a ni.

Staples Center a inkhelah Lakers chu an chak zo lo a, mahse James lawmpuina hun an hmang thung a. James chu Lakers player te chuan lawmpuina thu an hlan a, entu mipui pawhin James an lawmpui a ni tih lantir nan an thut hmunah an ding hlawm a. Video-ah a hun hman chhoh dan te an tilang a, hemi chhung hian James chuan towel in a lu a khuh daih a ni.

James chuan, “Ka vanglaiin thil chi hrang hrang ka lo ti ve tawh a, eng eng emaw ka lo tipuitling ve tawh bawk a. Tun tuma thil thleng hi chu championship title lak ang tlukin a ropui ka ti,” tiin a sawi.

“Akron, Ohio atanga chawr chhuak tan chuan entawn tur leh min fuihtu tur, kan ngaihsan em em tur an awm a tul a, ka tan chuan chutiang chu mi pakhat a awm a, Michael Jordan hi a ni,” a ti bawk.

A sawi zelnaah, “Michael Jordan inkhel lai hi hla deuh atang te hian ka lo thlir thin a, amah ang nih theih kha ka chak ber thin a. Michael Jordan anga fadeaway shoot theih ka duh a, Michael Jordan anga dunk hnua lei chhuah te kha ka chak a, Michael Jordan anga sneaker bun te kha ka chak thin a. Naupangin Michael Jordan an chhoh thlir a, an kawk ang khan naupang hian min ti ve se ka ti thin,” a ti.

An inkhelah a zawna vawi thum chak thei tawh lo Denver Nuggets chu a chak zawkah an tang a, LeBron James chuan chanchin duhawm tak nei mahse Los Angeles Lakers chu 115-99 in an hneh a ni.

NBA Top Scorers

1. Kareem Abdul-Jabbar - 38,387

2. Karl Malone - 36,928

3. Kobe Bryant - 33,643

4. LeBron James - 32,311

5. Michael Jordan - 32,292

6. Wilt Chamberlain - 31,419

7. Dirk Nowitzki - 31,362

8. Shaquille O'Neal - 28,596

9. Moses Malone - 27,409

10. Elvin Hayes - 27,313