LeBron James-a’n Lakers a khai ding zel

07th September 2020, 09:09PM

LeBron James chu a che tha hle a, a zarah LA Lakers chuan Houston Rockets an hneh theih phah a ni.

Western Conference semi final series Game 2 ah LA Lakers leh Houston Rockets te chu an inkhel a, he inkhelah hian kum 35-a upa LeBron James chu a langsar ber niin, Lakers pawh hi a zara chak thei an ni ber.

James hian triple-double a pha teuh hle a, assist vawi 1 chiahin a pha ta lo a. He inkhelah hian point 28 a score bakah rebound 11 lain assist vawi 9 a nei a. Lakers an chak takah chuan vawi hnih an inkhelh tawhah vawi khat ve ve an chak a ni.

He inkhelah hian James chuan three-pointer vawi khat chiah a thun a, heti chung hian NBA Playoff bika three point score hnem zingah a tel theih phah ta tho a. LeBron James hian postseason chhungin three point vawi 386 a thun tling tawh a, Ray Allen a lehpel a, vawi 470 thun thei Stephen Curry erawh a a um pha lo thung.

Anthony Davis chuan point 34 a thun a, rebound 10 a la bawk a, he inkhelah hian LA Lakers chuan Houston Rockets chu 117-109 in an hneh a ni.

Lakers player hlui Derek Fisher khan lansarhna bik riau a nei tam lo hle a, NBA Playoff bikah chak hnem ber record erawh a siam a, postseason game 259 khelhah vawi 161 a chak thei a ni.

Derek Fisher record siam hi LeBron James chuan a nihrual thei chiah a, vawi 161 chak thei turin game erawh a khel tlem zawk a, hetiang zat chak tur hian game 246 a khel a. An inkhelh leh hunah Houston Rockets an hneh theih chuan James hi record thar siamtu a ni thei ang.

NBA analyst Skip Bayless chuan a hmain LeBron James a sawi chhe nasa thei hle a, Houston Rockets nen an inkhelh lai erawh hi chuan a fak ve hle a. NBA Playoff huanga record ding lai a nihrual theih tak avangin a fak viau bawk a ni.

Copyright © inkhel.com 2024. All rights reserved.