NBA season tan hmain team hrang hrangte chu an inpuahchah chho mek a, pre-season match an khel chho hlawm a. Hetah hian LeBron James chuan a team thar LA Lakers chu Golden State Warriors lakah a chakpui.

Season thar an tan dawn hnai tawh hle a, a urlawknaah LA Lakers chuan 123-113 in Golden State Warriors chu an hneh a, Las Vegas khawpuia inkhelah hian LeBron James chuan point 15 a thun bakah rebound 10 lain assist 5 a nei bawk.

Lakers leh Warriors inkhelah hian a vawi khatna atan nikum lama No 2 overall pick Lonzo Ball leh James te hi an khel dun a. 2017 NBA Summer League-a Ball inkhel lai chu James hian nikum khan court sir atangin a thlir a, tunah erawh an khel dun ta a, James hian Ball chu a hmu hnai ta hle.

Lonzo Ball hi July thla khan a inhliam a, hei vang hian a inkhel mumal thei lo reng a, tunah chuan a ziaawm ve tan a. A tir atangin an luhtir lo a, mahse minute 2 vel an khelh hnuah Rajon Rondo thlak turin a lut ve tan a ni.

Golden State Warriors tan hian Steph Curry chuan point 23 a score a, Klay Thompson chuan point 20 a score bawk a. Kevin Durant chuan point 18 a thun bakah rebound 12 a la bawk a ni.

Inkhelh zawhah James chuan, “Kan inkhel chu nuam ka ti hle mai a, khatianga inhlawmkhawm kan awm khan a tinuam duh lehzual a. Ball khan basketball a khel a, basketball khelh thiam tak mai a ni,” a ti.

Season hmasa NBA Finals hnuah James hian Warriors a hmachhawn leh hmasak ber a ni a. LeBron hian Cleveland Cavaliers chu chhuahsanin kum li chhung atan Lakers nen $153.3 million free-agent contract an ziak a ni.