01 Oct 2020 04:34

inkhel

LeBron James-a’n champion ngei a tum

NBA Finals game hmasa berah Los Angeles Lakers chuan Miami Heat an hneh nghal a, an chak hnuah hian LeBron James chuan champion ngei a tum hle tih a sawi.

Los Angeles Lakers chuan Miami Heat chu Orlando, Florida-a an game hmasa berah hian 116-98 in an hneh a, NBA Finals-ah hma chu an hruai nghal a. An hmabak zelah pawh LeBron James chuan chak zui zel a tum thu a sawi a ni.

LeBron James chuan, “Kan nun chhoh zelnaa kan tana zirtirtu tha ber chu thil tawn hriat neih hnem hi a ni a. Tun thleng hian tawn hriat chi hrang hrang ka nei hnem ve tawh hlein ka hria a, ka inzirna pawimawh ber pawh an ni,” a ti.

“Tunah chak mah ila duhtawk mai chi a la ni lo a, bul kan la tan chauh a ni a. Hmabak thui tak a la awm a, inthlahdah thei kan la ni rih lo a, kan rilru put dan pawh kan thlak danglam a ngai,” a ti bawk.

A sawi zelnaah, “Kan inkhelh leh hunah chuan tun ai khan kan nawr nat zawk a tul ang a, chak duhna thinlung pawh kan put nasat zawk a tul hle ang a. Kan chet fuh tawk lohna angah khan insiamthat kan tum ang a, champion ngei hi kan tum dawn a ni,” a ti.

Tun tumah hian Lakers an champion thei a nih chuan an team hian NBA title vawi 17 an la thei dawn chiah a. A hmain vawi 16 an lo champion tawh a, NBA team hlawhtling ber dawttu tia sawi theih an ni a, Boston Celtics chiah tluk loh an nei a ni.

LeBron James chuan NBA Finals hi vawi 10 a lut ta chiah a, tun tumah hian Lakers a champion pui a nih chuan NBA title hi vawi 4 a la ve thei dawn tawh a ni.