18 May 2020 05:14

inkhel

LeBron James aiin Michael Jordan tha an ti zawk

Tun hnaiah khan NBA ngainatu tam tak chuan kawng hrang hranga tehin Michael Jordan chu LeBron James aiin a tha zawk niin an sawi.

Football huangah inhnialna tawp thei lo a awm mek a, Lionel Messi leh Cristiano Ronaldo te chu tha zawka sawi ve ve an ni a. Basketball huangah pawh hetianga inhnialna tawp thei lo hi a awm ve mek a, Michael Jordan leh LeBron James te inkara tha zawk sawi fel theih a ni bik lo a ni.

ESPN chuan tun hnaiah NBA ngainatute ngaihdan an la khawm a, he ngaihdan an lak khawm atang hian 73% te chuan kawng hrang hranga tehin Michael Jordan chu LeBron James aiin basketball player tha zawk a ni tih an pawm a ni.

Michael Jordan chuan NBA huanga LeBron James a luh ve hmain basketball khelh a chawlhsan hman a. Anni pahnih hi an hun lai chuan player ropui tak mai an ni ve ve a, tuna ngaihdan an lak khawmah hian mi 600 chuan an ngaihdan an sawi a, tehfung hrang hrang hmangin player pahnihte hi an khaikhin a ni.

An ngaihdan sawi chhuaktute hi mi chi hrang hrang, kum lamah pawh inang lo tak tak an ni hlawm a, a tlangpuiin kum 18 atanga kum 35 inkar vel bawr an ni hlawm a. Tlema kum upa deuh ngaihdan an lakah hian Jordan chu 4-1 (79%) velin a chungnung a, kum naupang lamah pawh 2-1 (66%) chuan a chungnung tho a ni.

Team chakpui thei tura rinawm zawk an thlantirah 76% te chuan Michael Jordan chu an thlang a, 65% chuan Jordan chu offensive player tha zawk nia an ngaih thu an sawi bawk a. One-on-one game khel ta se, point 21 hmu hmasa thei tur chu 67% chuan Michael Jordan a nih an rin thu an sawi.

LeBron James chu defensive player tha zawk niin an ngai a, passer tha zawk atan Jordan an thlang leh thung a. NBA huanga an teammate atana an duh zawk an thlantirnaah Michael Jordan thlangtu an thahnem zawk a ni.

Basketball court pawn lama thian anga kawm atan pawh Michael Jordan thlangtu hi an tam zawk a, 62% te chuan Charlotte Hornets neitupa hi an thlang a. 79% te chuan Le Bron-a Nike pheikhawk ai chuan Air Jordan an thlang zawk a, 77% te chuan Air Jordan chu inkhelhnaah pawh a tha zawk nia an ngaih thu an sawi a ni.