12 Oct 2020 04:19

inkhel

LeBron James aia ropui an la awm lo: Frank Vogel

LA Lakers coach Frank Vogel chuan LeBron James chu khawvela basketball player awm tawh zawng zawnga ropui ber a nih thu a sawi.

LeBron James chu basketball player zinga team hrang hrang pathum tana NBA Finals MVP ni thei hmasa ber a ni a. NBA Finals MVP hi vawi 4 a nih theih tawh bakah NBA title vawi 4 a la ta chiah bawk a, Frank Vogel chuan James aia tha an la awm loh thu a sawi chhuak.

James hian tluk loh pakhat a la nei a, Chicago Bulls player ropui Michael Jordan a la pha lo a. Jordan kha NBA Finals MVP vawi 6 a nih bakah NBA title vawi 6 a la thei bawk a ni.

Kum 35-a upa James hi a hmaa Miami leh Cleveland tana a khelh laiin NBA Finals MVP a lo ni tawh a, tun tumah hian a average chu 29.8 points a ni a, Finals ah hian 59% shooting a nei a ni.

Mi tam takin Michael Jordan chu basketball player ropui ber an la tih laiin Vogel chuan James hi a thlang ve thung a ni.

Frank Vogel chuan, “He khawvela basketball player awm tawh zawng zawng zingah LeBron James aia ropui an la awm lo a. Eng ang taka tha nge a nih tih hi mi hian an hre chiang lo zawk a, ni tin a bula hun hman chiah hian a thiam zia hi kan hre chiang lehzual,” a ti.

“James hian mi dang kaihhruai a thiam em em mai a, NBA huang chauh ni loin infiamna khawvelah chuan a aia hruaitu tha hi an awm ka ring lo a. Hma a hruai zel a, tu te pawh hi a ngaihtuahin a ngaihsak em em zel bawk a ni,” a ti bawk.

A sawi zelnaah, “Player dangte chu a be kual deuh reng thin a, a huhoa thil sawina hun te a neihpui a, tu te pawh hi a dah sang em em thei vek a, hetiang taka hruaitu nihna nei tha hi a ni tel bawk,” a ti.