LeBron James chuan Cleveland Cavaliers-ah contract a hmang zo ta a, contract a ziah belh tak loh avangin free agent a ni ta.
James hian Zirtawpni thleng khan a awm dan tur tihchianna hun a nei a, Cavaliers bula awm zel a tum thu a sawi tak loh avangin free agent a ni ta a. MVP vawi 4 ngawt lo ni tawh James bakah hian Paul George, Chris Paul leh DeMarcus Cousins te pawh player langsar si, free agent ni ta an awm bawk.
Cleveland Cavaliers a chhuahsan a nih chuan a awm zel dan tur hriat a la ni lo a, thenkhat chuan Los Angeles Lakers zawmin superteam thar a din duh mai an rin thu te an sawi a. Houston Rockets emaw, Philadelphia 76ers a zawm ringtu pawh an thahnem hle a. Free agent te hian July 6 hma chuan contract an ziak thei dawn rih lo a ni.
Tun hmain James hi vawi hnih chu free agent a lo ni tawh a, 2010 khan Cleveland-ah contract a hmang zo a, free agent niin Miami Heat a zawm a. 2014 khan Miami Heat nen contract an ziahah a hun tawp hmaa chhuah theihna chu hmang tangkaiin Cleveland a zawm leh bawk a. 2015 khan contract hi a pawt sei a, 2016 ah kum hnih chhung atan Cavaliers-ah contract a pawt sei leh a. 2018-19 season atan James hian $35.6 million hlawh theihna chu a hnar ta a ni.
An sawi dan chuan Cleveland hian LeBron James hi team dangte aia contract mawm zawk an zawrh thei a, kum 5 chhung atan $205 million hlawh thei turin an thlem thei a. James beiseitu dangte chuan kum 4 chhung atan $152 million vel an tawktarh ve thei niin an sawi.
Kum 33-a upa James hian season 15 chhung chu NBA khawvelah hian hun a hmang ve tawh a. Tun season chhungin game 82 a khel kim vek a, hetiang hi a vawi khat puitlinna a ni a, a average pawh 27.5 points niin, 2009-10 season hnua a average san ber tum a la ni a. Rebound pawh game tina 8.6 la ang vel niin, a career record a nihrual a, game tinah assist 9.1 nei ang a ni a, hei hi ama record thar a ni bawk a, field shooting hi 54.2% a ni bawk.
Playoff bikah khan a average chu 34 points niin, rebound 9.1 leh assist 9 a ni a, shooting pawh 53.9% a ni bawk a. Cavaliers chu NBA Finals-ah a zawnin vawi 4 a thlenpui a, Golden State Warriors erawh an hneh zo ta lo.
MVP voting-ah James hi pahnihna a ni a, point738 hmuin Rockets star James Harden (965) chu a tluk pha ta lo a. James Harden hi MVP a nih vawi khatna a ni.
Tunah tak chuan James te hi an chhungkuain chawlh hmangin Anguilla ah an awm mek a, engtin nge a awm zui zel dawn tih chu sawi theih a la ni lo a. Amah beiseitute hi aman a dawr vek dawn nge a aiawhte a tir dawn tih hriat a la ni rih lo a ni.