LeBron hian mi tam thei ang ber tihchhiat a duh: Jefferson

13th August 2019, 10:08PM

Richard Jefferson chuan LeBron James chu mi tam thei ang ber tihchhiat duh nia sawiin, amah ringhleltute chu season tan leh hunah ngawihtir hmak a tum niin a sawi.

LeBron James chuan 2018-19 ah khan Cleveland Cavaliers chhuahsanin Los Angeles Lakers a zawm a. Lakers chuan beiseina sang tak an nei a, NBA champion nih theih te pawh an inbeisei viau laiin, James chuan NBA playoff a khelhpui pha ta lo a ni.

Kum 34-a upa James hi Lakers tana a season hmasa berah a average chu 27.4 points niin, 8.5 rebound leh 8.3 assist a ni bawk a. A team tharte hian a zawnin season 6 chhung chu postseason an pumpelh ta a ni.

A inhliam avangin LeBron James chuan game 55 chiah a khelh theih phah a, 2004-05 hnua a vawi khatna atan NBA playoff chu a khel pha lo a. Heti chung hian 2015-17 chhunga Cleveland Cavaliers-a James nen khel dun thin Richard Jefferson chuan vawi thum ngawt NBA champion lo ni tawh leh vawi li lai MVP lo ni tawh chu a rawn invawrh chhuah leh a rin thu a sawi a ni.

Jefferson chuan, “LeBron James hi a hma ang bawkin khawvela basketball player tha ber a ni leh dawn chiang a ni,” a ti.

“Tunah chuan 08 vela LeBron James ang kha a ni leh ang em? Ni lo ang. Amaherawhchu, thil tam tak a rawn ti dawn a, thil tihpuitlin tur a nei teuh a. Tun hnaia a chet fuh vak loh avangin mi tam takin an nuihzat a, an hmusit a, an sawisel bawk a. Hetiang boruak hi a hre thiam vek a ni,” a ti bawk.

A sawi zelnaah, “Mi tam tak chuan James hi a upa tawh a, hmanlai ang kha a ni thei tawh lo niin an ngai a. Hetiang boruak hrang hrang hi a vanglai hian a tawng hnem tawh a, din chhuah phah nan a hmang tangkai fo thin,” a ti.

“Ka ngaihdan dik tak ka sawi ang a, a nihna takah chuan LeBron James hian a tan basketball aia pawimawh hi a awm lo a ni tih hi mi hriatah a lan chhuahtir thin a, hei aia a rilrua a dah len zawk hi a awm lo. Chutiang tilang thei tur hian tih theih pakhat chiah a nei a, chu chu mi tam thei ang ber tihchiat a ni,” a ti.

“Mi tihchhiat han tih hian basketball court chhungah a chungnun zia a lantir a, an hmaa ding team te an hneh zel theihna lai tak hi a ni a. Season kalta lamah khan an beisei ram an thleng thei lo a, tunah chuan dinhmun sang takah an ding leh thei ngeiin ka ring tlat a ni,” a ti bawk.

Los Angeles Lakers chuan New Orleans Pelicans atangin Anthony Davis an la a, an dinhmun pawh a tha lehzual tura ngaih a ni a. Kawhi Leonard lak an tum viau laiin Leonard hian Los Angeles Clippers a zawm ta daih a. Hemi hnuah hian Avery Bradley, Danny Green, Kentavious Caldwell-Pope, JaVale McGee, Quinn Cook, DeMarcus Cousins, Rajon Rondo leh Alex Caruso te chu an la bawk a ni.

Copyright © inkhel.com 2024. All rights reserved.