18 Aug 2020 07:41

inkhel

LeBron-a’n Space Jam 2 thawmhnaw tur a pho lang

LeBron James chuan basketball chungchang film an siam thar tura a thawmhnaw hak tur nia ngaih theih chu a pho lang.

Basketball chungchang film lar tak Space Jam tih chu 1996 kumah khan an lo siam tawh a, Michael Jordan leh Looney Tunes te an inkawp fuh hle a. He film hlawhtling tak mai chhunzawmna tur hi an siam leh dawn a, LeBron James chu hetah hian a inlan ve thung dawn a ni.

Space Jam 2: A New Legacy tih hi 2021 kuma tlangzarh theih tura ruahman niin, tun hnaiah khan LeBron James chuan Twitter-ah he film thara a thawmhnaw hak tur nia ngaih theih chu a pho lang a ni.

James-a jersey hakah hian Tune Squad tih chu chiang takin a inziak a, Looney Tunes ho hman thin thil bial pawh a inziak bawk a. Tune Squad logo leh Looney Tunes ho rin bial bakah hian James-a number pawh a thawmhnaw hakah hian an dah tel a. Miami Heat leh USA National Team tana a khelha a number 6 chu a jersey-ah hian hmuh tur a awm a ni.

He film thar tur hian tun atangin ngaihven a hlawh nghal hle a, ruahmanna an siamah chuan July 16, 2021 a tlangzarh tur a ni dawn a. LeBron James bakah hian Don Cheadle leh Sonequa Martin-Green te pawh an chang dawn a ni.

Mi lem an chettir zingah chuan Bugs Bunny, Lola Bunny leh Daffy Duck te kan hmu thei ang a, Kath Soucie pawh a inhnamhnawih ve leh dawn bawk a. NBA player thenkhat pawh inlan tura ngaih an ni a, Klay Thompson, Anthony Davis, Damian Lillard, Chris Paul leh Kyle Kuzma te hmel hmuh theih ngei tura ngaih a ni.

Anni bakah hian WNBA player te pawh an inlan dawn bawk a, Diana Taurasi, Nneka Ogwumike leh Chiney Ogwumike te chu an lang ngei dawn niin an sawi a. Lakers star Alex Caruso erawh chuan a lan theih loh tur thu a sawi chiang tawh a ni.