02 Jun 2015 07:44

digimalt

​League-ah chuan English Premier League a tha ber - Pirlo

Italian midfielder Andrea Pirlo hian eizawngin Italy ram a la chhuahsan lo, Serie A a tha ber ti tur nia a lan laiin English Premier League a tha a tih ber thu a sawi tlat mai. Pirlo hian hun tawn zingah 2005 Champions League final-a Liverpool an hneh loh kha hrehawm a la ti ber a, player zingah chuan Paul Scholes a ngaihsan thu leh a kianga a khel lo chu pawi a tih thu a sawi tel bawk.

Khawvela midfielder tha sawi a pianga a hming kan lam hmaih ngai tawh loh tur kum 36 mi Juventus midfielder Andrea Pirlo chuan a autobiography-ah 2005-a Istanbul Champions League final-a chak ngei tur nia a inrin laia Liverpool laka an tlawm ta kha hrehawm a la tih reng thu leh a football career mai ni lo, a nuna hun hrehawm ber pakhat a nih thu a tarlang.

Pirlo chuan English Premier League club te chu tun hnaia Champions League-ah che tha lo mahse nakin lawkah chuan ropui taka an rawn khelh leh a rin thu a sawi a. "Rei tak ka lo khel ve ta a, Europe-ah hian league lian hrang hrangte hian kan inthunun chhawk ni maiin ka hria.

"Tun hnaiah English team te chu che tha lo mahse hei hi tehna tur niin ka hre lo, nakkum lawkah chuan champion team an rawn nei leh mai thei ngei ang. English Club te hi khawvela club tha ber ni lo mahse English Premier League erawh khawvela Football league tha ber a ni tlat.

"Inelna a sang em em a, Champions League khelh tumin team panga atanga paruk vel an inel bawk a, hetiang hi league dangah kan hmu ngai lo a ni," tiin a sawi.

2008 khan Champions League semi final-ah English club pathum ngawt an lut a, final-ah Chelsea leh Man Utd an inhmachhawn a nih kha. Tun season liamta mai khan Man City, Arsenal leh Chelsea te chuan Last 16 an paltlang zo lova, Liverpool phei chuan Group stage an paltlang zo lo.

2013-14 khawn Chelsea chuan Last four lutin, United chuan last 8 an lut a. 2012-13 season pawh khan an che chhe hle, club pahnihin Group Stage an paltlang zo lova, a dang pahnihin last 16 an paltlang zo lo bawk a. Season sarih liamta chhung khan English Club pakhat chuan Champions League title a la hlauh a, season 10 liamta chhung khan vawi hnih chiah English Club an champion a ni. Heng hi a chhan pakhat ni thei chu match khelh tur an ngah bik em em vang leh Premier League inelna a san em em vang a ni thei.

Pirlo chuan tuna a ngaihtuah ber chu Inrinni zana Berlin-a Messi dan dan a nih thu a sawi rualin, an champion ngei theih nan 2005-a thil thleng kha chhawr tangkai a tum thu a sawi a,"Champions League-a chak nawm zia ka hria, chak loh hrehawm zia pawh ka hre chiang. Istanbul-a Liverpool laka kan tlawm kha ka football career-a ka hun tawn hrehawm ber a ni mai lo, ka nuna hun tawn hrehawm ber pakhat a ni tlat mai. Inrinnia kan inkhelh hmain khami tum kha ka ngaihtuah chhuak leh anga, kha khan min fuih phur ngei ka ring a ni, inkhelh zawha khatianga awm leh kha ka duh tawh lo a ni," tiin.

Pirlo chuan a team-mate Pogba chu United in an chhuah ta mai kha mak a tih thu a sawi nawn leh a, Sir Alex Ferguson chuan a thiam loh vangin a chhuah a rin loh thu leh mimal thu leh hla vang a nih thu a sawi rualin, kha lam sawi vak ai chuan Juventus-in an chang erawh a lawm thu a sawi chhunzawm a. Football a khelh chhunga player ropui tak tak a khelhpui loh zingah Paul Scholes chu a ngaihsan ber thu sawiin, player fing leh tha ber pakhat a nih thu a sawi chhuak a ni.