MotoGP champion lai Marc Marquez chu Inrinnia French Grand Prix qualifying-ah a che tha ber a, Pathiannia intlansiak hunah a hma ber atangin a tlan tan dawn a ni.

Repsol Honda rider Marc Marquez chu Q2 ah a tlan tha ber a, tun season chhunga a vawi thumna atan tlan chak ber a ni ta a. Pole position a chan leh theih takah chuan Valentino Rossi a nihrual ta chiah a, anni pahnih hian vawi 55 ve ve pole position an chang ta a ni.

Pathiannia Le Mans circuit-a an intlansiak hunah Marquez hnung chiahah hian Ducati rider Danilo Petrucci a awm ang a, Pramac Racing rider Jack Miller chu pathumnaah a awm dawn bawk a ni.

Marquez hi qualifying-ah hian a che tha tluanchhuak bik chiah lo a, a tleng palh a, a sira lei phihritah chuan a tleng chhuak a. A tluk hnu hian a tlan chhunzawm leh thei tho a, a hmaa minute 1 leh second 40.952 record a lo siam tawh chu tu mahin an khum thei ta chuang lo a. Rossi nihrualin pole position vawi 55 a chang ve ta a, pakhat chiah phak loh a nei ta a, Mick Doohan aiin vawi 3 chauhin a tlem tawh a ni.

Le Mans-ah hian ruah a tlak avangin duh angin rider te chu an tlan thei hlawm lo a, Monster Energy Yamaha rider Valentino Rossi pawh a che buai zingah hian a tel a. Vawi sarih ngawt world champion lo ni tawh Rossi hi panganaah a awm dawn a, a hma chiahah hian Ducati rider Andrea Dovizioso chu a awm bawk a ni.

Petronas Yamaha rider Franco Morbidelli chu paruknaah awmin, a hnungah hian LCR Honda rider Takaaki Nakagami, Repsol Honda rider Jorge Lorenzo, Aprilia Racing Team Gresini rider Aleix Espargaro leh Petronas Yamaha rider Fabio Quartararo te an awm a ni.

Qualifying result
1. Marc Marquez (Repsol Honda): 1:40.952secs
2. Danilo Petrucci (Ducati): 1:41.312s
3. Jack Miller (Pramac Racing): 1:41.366s
4. Andrea Dovizioso (Ducati): 1:41.552s
5. Valentino Rossi (Monster Energy Yamaha): 1:41.655s
6. Franco Morbidelli (Petronas Yamaha): 1:41.681s
7. Takaaki Nakagami (LCR Honda): 1:42.059s
8. Jorge Lorenzo (Repsol Honda): 1:42.067s
9. Aleix Espargaro (Aprilia Racing Team Gresini): 1:42.450s
10. Fabio Quartararo (Petronas Yamaha): 1:42.509s