Inter Milan striker Lautaro Martinez chu Barcelona nen nasa taka sawizawm a ni a, Lautaro hian nipui bazar inhawn hunah Barcelona a zawm ngei dawn niin chanchinbu thenkhat chuan an tarlang.

Inter Milan sporting director Piero Ausilio erawh an striker chu zawrhlai a nih loh thu a sawi a, a mah lei duh tu in a release-clause an pe tla a nih ngawt loh chuan kum 22 mi hi hralh an tum loh thu Ausilio hian a sawi.

Lautaro hian tunah hian Inter-ah release-clause euro maktaduai 111 (pound maktaduai 97) a nei meka, he release-clause hi July thla ni 15-ah thi dawnin, Barcelona hian Argentine forward hi an lei duh a nih chuan July ni 15 hmaa an chet ngei a ngai dawnin a lang.

Ausilio chuan Sky Italia a hrilh danin, “Lautaro hi zawrhlai a ni lova, Inter a chhuahsan theih dan awmchhun chu a release-clause pek tlak chauh a ni. A clause neih hi tu pawhin an hre veka, thup tur a awm lo.

“Mahse Lautaro-a clause hian dam hun chhung mumal tak a nei a, July thla chawhma lama thi tur a nih avangin hun rei tak a daih tawh lo. Hei chiah hi Inter atanga Lautaro leichhuah dan kawng awm a ni,” a ti.

Serie A season kal mekah Inter Milan hi pathumnaah an awm meka, Lautaro hian Inter tan goal 16 a khung tawh.

Sawi zelin Ausilio chuan, “Lautaro hi Inter tana player hlu a ni a, kan hnenah kum thum daih contract a la nei tih pawh hi theihnghilh loh tur a ni. Inter hian kan player pawimawh ber te hralhchhuah kan tum reng reng lova, kan player tha te chelh chunga inthawm that zual zawk chu kan thil tum niin, hetah hian Lautaro pawh ka sawi tel a ni.

“Lautaro-a chungchangah hian club tam takin min dawra, chung zinga bei ngawrh ber chu kan inkhungkaih that pui em em Barcelona an ni a, thup ka tum lo. Barcelona hian kan rilru dik tak an hria a, Inter hian Lautaro Martinez hi hralh kan tum lo, a duh tan chuan clause a awm tih hi ka sawi nawn duh a ni,”a ti bawk.