Spanish tennis star Rafael Nadal chu 2021 Laureus Sportsman of the Year atan an thlang a, tennis star tho Naomi Osaka chu Sportswoman of the Year atan an thlang bawk a ni.
World No. 2 Rafael Nadal chuan French Open title vawi 13 a la thei a, title lian hi 20 ngawt a la tawh bawk a, hei vang hian chawimawina dawng tur hian an thlan phah a. Laureus Sports Award hi vawi 4 a dawng tling ta chiah a. Japanese star Naomi Osaka chuan a vawi hnihna atan US Open title a la a, major title 4 a la ta chiah a, Laureus Sports Award hi vawi hnih a dawnna chiah a ni.
Kuminah hian coronavirus hri leng vangin Laureus Sports Award hi Seville, Spain atangin digital-in an sem a. World Team of the Year chawimawina chu Bayern Munich hnena hlan niin, Athlete Advocate of the Year chu Formula 1 champion Lewis Hamilton hnena hlan a ni bawk.
Liverpool leh Egypt striker Mohamed Salah hnenah Sporting Inspiration Award hlan a ni a, Billie Jean King chu chawimawina ropui Lifetime Achievement Award an hlan bawk a ni.
Rafael Nadal chu chawimawina dawng thei tur hian vawi 8 chhawp chhuah a ni tawh a, vawi 4 chu a dawng thei ta a. 2011 ah khan a vawi khatna atan Sportsman of the Year atan an thlang a, 2006 kumah khan chawimawina a dawn hmasak ber niin, Breakthrough of the Year a lo dawng tawh a. 2014 kumah khan Comeback of the Year chawimawina a lo dawng tawh bawk a, he mi kumah vek hian Sportsman of the Year chawimawina dawng tura chhawp chhuah a ni.
Naomi Osaka chu chawimawina dawng thei tur hian vawi thum an lo chhawp chhuak ve tawh bawk a, hengah hian vawi hnih chu chawimawina dawng tura thlan a ni a. 2019 kumah khan Breakthrough of the Year chawimawina a lo dawng tawh a, 2020 ah khan Sportswoman of the Year chawimawina dawng tura chhawp chhuah zingah a tel a ni.
Bayern Munich tan pawh Team of the Year chawimawina dawn chu thil thar a ni tawh chiah lo a, he chawimawina dawng tur hian 2002 ah khan an lo chhawp chhuak tawh a, 2014 ah khan a vawi khatna atan he chawimawina hi an lo dawng tawh a ni.
Comeback of the Year chawimawina chu Max Parrot hnena hlan niin, January 2019 ah khan damlohna avangin a inenkawl a, thla ruk chhung chu chemotherapy a la a. He mi hnuah hian infiamna huangah kir lehin, August thlaah khan Oslo khawpuiah X-Games snowboarding big air event-ah a chungnung ber a. January, 2020 ah khan Aspen khuaah X-Games gold medal a la leh a, March thlaah Norway ramah pawh a la leh bawk a ni.
Breakthrough of the Year chu Patrick Mahomes hnenah an hlan a, Sporting Moment of the Year chawimawina chu Chris Nikic hnenah an hlan bawk a. Sport for Good Award chu Kickformore by Kickfair te hnena hlan a ni.
Laureus World Sports Awards 2021:
Sportsman of the Year Award: Rafael Nadal
Sportswoman of the Year Award: Naomi Osaka
Team of the Year Award: Bayern Munich
Breakthrough of the Year Award: Patrick Mahomes
Comeback of the Year Award: Max Parrot
Sport for Good Award: KICKFORMORE by KICKFAIR
Lifetime Achievement Award: Billie Jean King
Athlete Advocate of the Year Award: Lewis Hamilton
Sporting Inspiration Award: Mohamed Salah
Sporting Moment of the Year Award: Chris Nikic