England chuan 6-1 ngawtin Panama an sawp a, Group G atangin knock out stage an lut a, Panama kawng erawh a tawp tawh thung.
He inkhelah hian England captain Harry Kane chuan goal thum a thun a, English footballer zingah World Cup-a hattrick siam thei pathumna a ni a. Panama tana goal thuntu, substitute Felipe Baloy chu an ram tana World Cup goal thun hmasa ber a ni.
Nizhny Novgorod a inkhelah a tir atangin England chu an chungnung nghal hle a, Panama chu a tikimtu an ni deuh ber mai a. Minute 8 chauh an khel hman tihin England chuan goal an thun nghal der mai a. Kieran Trippier chuan corner a pet a, heta ball kal hi John Stones chuan a lo tauh lut a ni.
Minute 22-ah Jesse Lingard chu Panama box-ah an tihtluk avangin England hian penalty an hlawh a. Harry Kane chuan penalty hi a pet a, a hlah lo chiang a, England chuan 2-0 in hma an hruai theih phah a.
England hian an la duhtawk mai lo hle a, minute 36-ah England tana penalty hlawh chhuaktu Lingard chuan a ke dinglam hmangin England goal thumna a thun ve leh a, 3-0 a ni ta.
Hemi hnu deuh lawk, minute 40-ah an goal hmasa ber thuntu John Stones bawk a inlar leh a. Raheem Sterling chuan Panama goal-ah ball chu tauh luh a tum a, mahse ball hi goalkeeper Penedo chuan a lo dang a. Ball let leh hi centre back Stones chuan a lo tauh lut a, England chuan 4-0 in hma an hruai a.
Half time a ni dawn a, England hian goal dang an thun belh leh a. Panama box chhungah John Stone chu an titlu a, England hian penalty an hlawh leh a. Harry Kane bawk chuan penalty hi petin a goal hnihna leh England goal 5-na a thun a, half time a ni zui.
Second half an khel tan leh a, a ngai tein England chuan an nawr chho leh tan a. Minute 62-ah Harry Kane chuan Ruben Loftus-Cheek zarah goal dang a thun leh a, hattrick a siam a, England chuan 6-0 in hma an hruai theih phah bawk a.
Tottenham Hotpur striker Harry Kane hi English footballer zingah chuan World Cup bika hattrick siam thei pathumna a ni a, a hmain Geoff Hurst leh Gary Lineker te chuan World Cup hattrick an lo siam tawh a ni.
He inkhela goal la chhuah lo England goalkeeper Jordan Pickford chuan goal chhuah loh tluanchhuah tum mahse a thei ta lo a. Minute 78-ah Ricardo Avila chuan Panama free kick a pet a, heta ball kal hi Felipe Baloy chuan Everton goalkeeper man theih lohin a thun a, Panama tana World Cup goal thun hmasa ber a ni.
Hun tawpah England chu 6-1 in an chak a, Group G atang hian England leh Belgium te chuan point 6 ve ve hmuin pre-quarter final an thleng ta a. Anni pahnih hi Nilaithawhtan hian an group leader nih inchuhin an inkhel ang.