23 Mar 2020 10:48

bakteaJr.

Mizo tlangval

​Lar zui lo Rafael leh Fabio

Rafael da Silva leh Fabio da Silva-te hi Sir Alex Ferguson-a’n Manchester United a enkawl laia inkhel en thin chuan kan hre vek ngei anga, phir niin, Sir Alex khan a hmang thiam thin hle a nih kha.

An pahnih hian fullback ve ve niin Rafael hi right-back ah a khel thina, Fabio left-back ah a khel ve thunga, Sir Alex khan hmang thiam viau mahse Sir Alex awm loh hnuah an unau hian an lar zui lo hle a, mi tam tak chuan an awmna chin pawh kan hre tawh lo hialin a rinawm.

Rafael leh Fabio te hi July ni 9 kum 1990 khan Rio de Janeiro, Brazil ah an pianga, tunah hian kum 29 mi an ni a, Rafael hi French club Lyon tana khel mekin Fabio hi French club Nantes tan a khel ve thung.

Kum 11 mi lek an nih laiin Brazilian club Fluminense chuan an unau hian an academy-ah an la luta, January thla kum 2008 khan an pahnih hian Manchester United chuan an leia, mahse hemi kum July thlaa kum 18 an tlin hma chu United tan an khel thei lo thung.

Rafael hi a lar zawka, Sir Alex pawhin hmang rim viauin, Fabio erawh duh angin Sir Alex-a hnuaiah khelhna hmun a chang tam lova, mahse Sir Alex chuan a tul hunah a hmang dun fo va, right wing leh left wing lamah an unaua dah kawp chang te pawh a nei zeuh zeuh.

Fabio zawk hian nupui a nei hma hle a, kum 18 mi a nih hian kum 17 mi Barbara nen an innei der tawha, Barbara hian Manchester-ah zuiin Sir Alex chuan Fabio-a inneih zungbun chu an unau hriathran nan hian a hmang thin niin an sawi nghe nghe.

Rafael hi Manchester United-ah kum 2015 thleng khan a awma, hemi hnu hian Lyon zawmin, tun thlengin Lyon tan a la khela, Fabio erawh duh anga hmun a chan tam loh avangin United tang hian kum 2012 khan loan-in Queens Park Rangers a zawma, kum 2014 khan Cardiff City chuan an la luta, kum 2016-ah Middlesbrough-ah lutin, kum 2018 khan tuna a khelh mekna Nantes a zawm.

Rafael hian Manchester United tan Premier League title pathim, League cup pakhat leh FIFA Club World Cup pakhat a la hmana, Fabio hian United tan Premier League title pakhat a la hman ve bawk.

Rafael hi kum 2010 khan Brazil senior team-a khel tura koh a ni a, mahse Brazil hian rightback an neih that em avangin Rafael hian a ram tan game hnih bak a khel lo. Fabio hi kum 2011 khan Brazil senior team tana khel tura koh a ni tana, ani pawh hian Brazil senior team tan game hnih bak a khel lo a ni.