US Open champion thar Naomi Osaka chuan tun hnaia a lar chho chu nuam a tih loh thu a sawi a, a zahzum avanga nuam ti lo a nih thu a sawi.

Kum 20-a upa Naomi Osaka hian Flushing Meadows-ah rin kai zawk Serena Williams chu a hneh a, US Open title lain, Japanese player zingah chuan Grand Slam title la thei hmasa ber a ni a. A beisei phak loh dinhmuna a din hnuah mi hriat a hlawh chhoh avangin a nunphung chu a danglam phah hle niin a sawi.

Naomi Osaka hi zakzum deuh mai a ni a, hei vang hian milar han nih ve tak mai chu nuam a tih lutuk rih loh thu a sawi a, a tan kawng hrang hrangah harsatna a awm theih thu a sawi a. Hetih rual hian nasa zawka hlawhtlinna hmel a hmuh zel theih nan lar chu pawi a tih loh thu a sawi.

Osaka chuan, “Lar chu nuam tih lohna ka nei teuh a, mahse a awm ve theih zel tho a. Tun aia nasa zawka chak chhoh zel ka la duh avangin lar chu hreh viau mah ila dan theih a ni dawn lo a ni ber a. Lar ka duh lohna hi ka hlawhtlinna kawng daltu nihtir ka tum lo a ni,” a ti.

World No. 7 hian New York khawpuia title a lak chu duhtawk mai a tum loh thu sawiin, trophy tam tak lak theih a duh thu a sawi a, kum thar January thlaa Melbourne khawpuia Australian Open khelh hunah champion leh theih ngei a tum tur thu a sawi.

“Tournament lian awm hnai leh ber chu Australian Open a ni a, beiseina sang tak nen champion tumin ka bei dawn a ni,” a ti.